''Fənərbaxça'' və ''İstanbul BŞ''nin ardından Türkiyəni bu mövsüm avrokuboklarda təmsil edən daha bir komanda - ''Beşiktaş'' üçün də mübarizə başladı.

İstanbul nəhəngi Avropa Liqasının 2-ci təsnifat mərhələsində doğma meydanda ''Midtüllann'' ilə qarşılaşdı. Maraqlıdı ki, ''ağ-qaralar'' tarixdə ilk dəfə Danimarka təmsilçisi ilə üz-üzə gəldi. Halbuki bu, ''qartal''ın Avropa arenasında artıq 259-cu oyunu idi. Vinçentso İtalyanonun debüt oyunu uğurlu alındı.

Düzdü, ''Beşiktaş'' da ''Fənər'' kimi bir çox gözəl fürsətləri boşa verərək yalnız bir qol vura bildi. Özü də nəzərə alaq ki, Danimarka təmsilçisi 15-ci dəqiqədə Fraydey Etimin qırmızı vərəqə alması ilə matçın böyük hissəsini azlıqda keçirdi. Amma minimal hesablı qələbə də elə qələbədi.

Görüşdə yeganə qolu 26-cı dəqiqədə Orkun Kökçü vurdu. Kapitan əla zərbə ilə topu uzaq küncə göndərdi. Meydan sahiblərinin heyətində Junior Olaytan ilk yarıda iki dəfə əla fürsəti boşa verdi. Yeni transferlər özlərini yaxşı tərəfdən göstərdilər. Həm İlhan Fakılı, həm Salih Özcan oyunu ilə alqış qazandı. Qapıçı Aleksander Nübelə çox iş düşməsə də, o da inamlı performans ortaya qoydu. Bir epizodda rəqiblə təkbətəkdən qalib ayrılaraq komandasını qoldan xilas etdi.

Beləliklə, ''Beşiktaş'' səfərə minimal üstünlüklə yollanacaq. Cavab oyunu iyulun 30-da Danimarkada baş tutacaq.