Frits Stuxlikin gedişindən sonra Hakimlər Komitəsinə kimin rəhbərlik edəcəyi maraqla gözlənilirdi.

AFFA-nın boş qalan kreslonu yenidən əcnəbiyə tapşıracağı xəbəri hələ bir müddət öncədən yayılmışdı. Kimdi Barış Şimşək?

Trabzonda anadan olan, peşəkar hakim karyerasına 1999-cu ildə başlayan Şimşək 2002-dən Türkiyə superliqasının oyunlarına təyinat alıb. O, son olaraq Türkiyə Futbol Federasiyasının Hakimlər Komitəsində VAR əlaqələndiricisi və hakim işləri müdiri vəzifələrini tutub. Onu da qeyd edək ki, Şimşək bir müddətdi Bakıdadı və AFFA rəhbərliyi ilə bir neçə görüş keçirib. Türkiyəli yeni sədr azərbaycanlı hakimlərə yaxşı bələddi. Məlumat üçün bildirək ki, Şimşək onlara İstanbulda VAR protokolu ilə bağlı üç seminar keçib. Seminarda premyer-liqaya təyinat alan baş hakimlər və hakim köməkçiləri, birinci divizionda fəaliyyət göstərən referilər, həmçinin “CBC Sport” telekanalının operatorları iştirak edib. Türkiyəli təlimatçılar Barış Şimşək və Burçin Kəskinin, həmçinin AFFA-nın Hakimlər Komitəsinin sədri Frits Stuxlikin qatıldığı dərslərdə nəzəri məşğələlərlə yanaşı, praktiki təlimlər də təşkil olunub. Onu da vurğulayaq ki, VAR sistemi ilə bağlı Türkiyədə ilk seminar noyabrın 2-4-ü, ikinci seminar 30 noyabr - 2 dekabr aralığında təşkil olunmuşdu.
Barış Şimşək 1976-cı il aprelin 9-da anadan olub. 1993-2000-ci illərdə Trabzondakı Qaradəniz Texniki Universitetində “Mülki inşaat”, 2001-04-də isə həmin universitetdə “Biznesin idarə olunması” (Masters Degree) ixtisasları üzrə ali təhsil alıb. 2006-09-cu illərdə Türkiyə Futbol Federasiyasının (TFF) Trabzon üzrə regional hakimi, 2006-19-da TFF-nin elit hakimi, 2013-15-də FIFA referisi kimi fəaliyyət göstərib.

Türkiyə superliqasında 200-dən, beynəlxalq turnirlərdə isə 100-dən çox oyunda hakimlik edib. Çempionlar Liqası, Avropa Liqası və Avropa çempionatının oyunlarına təyinat alıb (baş hakim, baş hakimin əlavə köməkçisi, 4-cü hakim). 2019-cu ildən etibarən TFF-nin Hakim İşləri Müdirliyinə rəhbər və TFF-nin VAR layihəsinə əlaqələndirici təyin olunub.

Beynəlxalq təyinatları (baş hakimin əlavə köməkçisi)
2013 – Aralıq dənizi oyunları, Mersin
2014 –Avropa Liqası, yarımfinal. Lissabon
2015 – Çempionlar Liqası, final. Berlin
2016 – Avropa çempionatı, final mərhələsi. Fransa
2016 – Çempionlar Liqası, yarımfinal. Mançester
2016 – Çempionlar Liqası, yarımfinal. Madrid
2017 – Çempionlar Liqası, yarımfinal. Madrid

Kurslar
2012 – UEFA-nın hakimliyə giriş kursu. Nyon. Referi
2013 – UEFA-nın yeni beynəlxalq hakimlər kursu. Roma. Referi
2013 – UEFA-nın konsolidasiya kursu. Nyon. Referi
2014 – UEFA-nın 1-ci əlavə hakim köməkçisi kursu. Nyon. Əlavə hakim köməkçisi
2019 – UEFA-nın 27-ci Advanced kursu. Lissabon. VAR
2019 – UEFA-nın 4-cü VAR kursu. Malaqa. VAR
2019 – UEFA-nın 8-ci VAR kursu. İstanbul. VAR təlimatçısı
2019 – UEFA-nın 9-cu VAR kursu. İstanbul. VAR təlimatçısı
2019 – UEFA-nın 10-cu VAR kursu. İstanbul. VAR təlimatçısı

RƏŞAD