Dövlət divizion klublarına da vəsait ayıracaq - AÇIQLAMALAR
İyulun 15-də AFFA-nın İcraiyyə Komitəsinin videokonfrans formatında növbəti iclası keçirilib.
İclasda qəbul olunan qərarlardan biri də Region Liqası komandaları ilə bağlı idi. Qərarda bildirilir:
“Region Liqası komandalarının 1-ci divizionda çıxış edə bilməsi üçün AFFA-nın baş katibliyi və PFL tərəfindən meyarlar müəyyənləşdirilsin. Meyarlara tam cavab verən və müvafiq müraciəti ilk təqdim edən klubun 2022/23 mövsümündə 1-ci divizionda çıxışı təmin olunsun".
Xatırladaq ki, daha öncə üç klubun 1-ci divizionda çıxışı təmin edilib. Bunlar “Araz-Naxçıvan”, “Mingəçevir” və “İmişli”di. Görünən odu ki, növbəti mövsümdən etibarən daha bir klub 1-ci divizionda çıxış edəcək. Bunu nəzərə alıb, Region Liqasının iddialı klublarının rəsmilərinin qərara münasibətini öyrəndik.
Famil Məmmədov (“Xan Lənkəran”ın mətbuat katibi): “Biz bu məsələ ilə bağlı müraciəti əvvəlcədən etmişdik. Hazırda isə meyarların açıqlanmasını gözləyirik. Ondan sonra sənədlərimizi həmin meyarlara uyğunlaşdıracağıq. 1-ci divizionda çıxış etməyə hazırıq. Sadəcə, 3 il Region Liqasında çıxış etmək məsələsi var idi. İndi gözləyirik, görək bu məsələ meyarlarda da əksini tapacaq, ya, yox. Belə olsa, yəqin ki, veriləcək qərar da ona uyğun olacaq”.
Vasif İsmayılov (“Füzuli”nin baş məşqçisi): “Biz artıq bu istiqamətdə işlərə başlamışıq. Klubun prezidenti Bəşir müəllim də dünən axşam rəsmi “feysbuk” səhifəmizdə iş adamlarına müraciət edib. Onlardan da müsbət cavablar gəlir. Əslində hələ meyarlar bizə məlum deyil. Amma təxmin edirik ki, peşəkar futbolda maliyyəyə daha çox ehtiyac var. Ona görə də indidən işlərə başlamışıq. Bizi 1-ci diviziona buraxsalar, ilk dövrədə Beyləqanda, fasilədən sonra isə Füzuli şəhər stadionunda oynamaq istəyirik. Füzuli Qarabağın qapısıdı. Vətən müharibəsində də bu şəhərin azad olması müharibənin taleyinə böyük təsir göstərdi. Belə olan halda 1-ci divizionda Qarabağı təmsil edən bir komandanın iştirakı çox yaxşı olardı”.
Taleh Gülməmmədov (“Qobustan”ın viste-prezidenti): “İndi AFFA-dan gəlirik. Klub rəsmiləri ilə federasiyada olduq. Dedilər ki, meyarlar bu gün rəsmi sayt vasitəsilə açıqlanacaq. Onlara uyğun sənədləri hazırlayıb iyulun 25-nə kimi quruma təqdim etməliyik. Hazırda meyarları gözləyirik ki, məlumatımız olsun və ona uyğun hazırlaşaq. İnşallah, 1-ci divizionda oynamaq niyyətindəyik. Dünən rəsmi “instaqram” səhifəmizdə paylaşım edərək, iş adamlarından dəstək istədik. Artıq bununla bağlı bizlə əlaqə saxlayanlar olub. Bir neçə sponsor oldu ki, klubu götürmək istədi. Hazırda seçim qarşısında qalmışıq. Onlardan birini klubun sponsoru seçəcəyik”.
Rəmzi Eminli (“Ağsu Siti”nin prezidenti): “Bu qərardan bir gün öncə Sərxan Hacıyevlə görüşümüz oldu. Biz 3-4 ildi Region Liqasında oynayırıq. Titulumuz da olub. Klub yaratmışıq, məqsədimiz irəli getmək olub. Sərxan müəllim dedi ki, bu il yox, amma növbəti il sizi 1-ci diviziona qatmaq planı var. Sponsor məsələsi ilə bağlı da söhbət etdik. Bildirdi ki, yüksək liqa kimi, 1-ci diviziona da dövlət tərəfindən vəsait ayrılacaq. Bu söhbətimizdən bir gün sonra isə qərar verildi ki, 1-ci diviziona bir komanda yüksələcək. Ondan sonra federasiya ilə əlaqə saxladım. Dedilər ki, bu gün (dünən) meyarlar bilinəcək. Onda hər bir klub öz hazırlığını meyarlara uyğun həyata keçirib AFFA-ya təqdim edəcək. “Xan Lənkəran”ı xatırlatdım ki, ən real namizəd bu klubdu. Mənə dedilər ki, bu qərar Region Liqasında 3 ildən az çıxış edən komandalara şamil olunmur. Meyarlarda göstərilənlərdən biri də odu ki, klub Region Liqasında minimum 3 il çıxış etməlidi. Bizim stadionumuz da 1-ci diviziona uyğundu. Bütün yaş qrupları üzrə uşaq komandalarımız da var. Düzdü, “Neftçi”nin tərkibindədi, amma əslində bizim kluba aiddi. Diviziona çıxsaq, götürəcəyik. Ona görə artıq sənədləri hazırlamağa başlayıb AFFA-ya müraciət edəcəyik”.
ŞAİR ABDULLA
