"Səbail”dən ayrılan Fərhad Vəliyevin işsiz günləri çox çəkmədi.

"Qartallar”ın baş məşqçisi Rəşad Sadıqov vaxtilə çiyin-çiynə futbol oynadığı sabiq komanda yoldaşını yanına dəvət etdi ki, dünən “Zirə” Vəliyevi qapıçılar üzrə məşqçi kimi ictimaiyyətə təqdim etdi.

Fərhad bəylə söhbətdə həm yeni iş yeri, həm də bizi maraqlandıran başqa mövzular barədə söhbətləşdik.

- İşsiz günləriniz çox çəkmədi. Bu gün (dünən) artıq “Zirə” sizi qapıçılar üzrə məşqçi kimi ictimaiyyətə təqdim etdi. Yeni təyinatınızla bağlı fikirlərinizi bilmək istərdik.

- İlk növbədə mənə etimad göstərdiyinə görə “Zirə”nin baş məşqçisinə təşəkkür etmək istəyirəm. “Səbail”dən ayrılandan sonra Rəşad Sadıqov mənimlə əlaqə saxladı, yanında görmək istədiyini bildirdi. Görüşdük, qısa müzakirələrdən sonra təklifi qəbul etdim. Sadıqovun həm məşqçi, həm də insan kimi nəyə qadir olduğunu bilirəm. Uzun illər istər klubda, istərsə də yığmada bir yerdə oynamışıq. Ambsiyalı, daim nəticə qazanmağı hədəfləyən mütəxəssisdi. Ümid edirəm ki, işbirliyimiz uğurlu olacaq, bir yerdə həm daxili çempionatda, həm də avrokuboklarda ürəkaçan nətizələr qazana biləcəyik.

- “Zirə”yə gedişiniz kimi, “Səbail”dən ayrılmağınız da gözlənilməz oldu. Halbuki çempionatın sonuna bir neçə tur qalmış rəhbərlik məşqçilər korpusu ilə yeni müqavilə bağlamışdı. Nə baş verdi?

- Sizin də dedyiniz kimi, hər şey gözlənilməz oldu. Rəhbərlik həm baş məşqçi, həm də köməkçiləri ilə yeni anlaşma imzalamışdı. Ancaq son turdan sonra dedilər ki, sizinlə yolları ayırmaq qərarına gəldik. Nə olduğunu heç birimiz başa düşmədik. Səbəbini soruşduqda “rəhbərlik belə qərar verdi” dedilər. Bundan sonra biz nə edə bilərdik?

- Artıq “Zirə” ilə bir məşqə çıxmısız. “Səbail” və “Zirə” arasında paralellər aparsaq, hansı ortaq və fərqli cəhətləri qeyd etmək olar?

- “Zirə”nin daim iddialı olması, həmişə yüksək yerlər uğrunda mübarizə aparması diqqəti çəkən məqamdı. Başa çatan mövsümə baxanda komandanın nəyə qadir olduğunu görmək mümkündü. Çempionatı ilk “üçlük”də başa vurmaq, ölkə kubokunun finalında “Qarabağ”a qarşı sərgilənən oyun komandanın potensialından xəbər verir. “Səbail” də, son mövsümü nəzərə almasaq, pis komanda deyildi. Sadəcə, geridə qoyduğumuz “futbol ili”ndə maliyyə problemləri səbəbindən çox çətin dönəm keçirdik. “Səbail”də 4 il çalışdım, bürünc medal qazandıq. Orda çalışdığım 4 il məşqçi kimi inkişafımda böyük rol oynadı. Hər iki komandada savadlı, uğur qazanmağı hədəfləyən baş məşqçi ilə birgə çalışmışam.

- Hazırda “Zirə”nin “çərçivə qoruyucuları” olan Mehdi Cənnətovla Anar Nəzirovu çoxdan tanıyırsız. Hətta hər ikisi ilə komanda yoldaşı olumusuz. Onlar barədə fikirlərinizi bilmək istərdik.

- Hər ikisi sözünü demiş qolkiperlərdi. Ancaq qarşıda bizi bir-birindən ciddi sınaqlar gözləyir. Artıq gələn ay komanda Konfrans Liqasında oyuna çıxacaq. Çalışcağıq həmin qarşılaşamalara kimi qolkiperlərimiz formada olsunlar. Düşərgədə gənc qapıçılar da var ki, onların da inkişafı üçün çalışmalıyıq.

- Cənnətov bir ara yığmaya dəvət alsa da, son vaxtlar Canni de Byazi onu diqqətdən kənarda saxlayır. Səbəbi ilə maraqlanmısız?

- “Zirə”yə gəldiyim ilk gündən bu məsələ ilə maraqlandım. Məlum oldu ki, Mehdi zədə səbəbindən kənarda qalıb. Premyer-liqanın son turlarını buraxan qolkiper ölkə kubokunun finalında da meydana çıxa bilməyib. Hazırda onun vəziyyəti yaxşıdı, zədəsini sağaldıb. Artıq var qüvvə ilə məşq edir. İnanıram ki, Konfrans Liqasında “Zirə”nin qapıçıları inamlı oyunları ilə azarkeşləri sevindirəcəklər.
RƏŞAD