Klub top səviyyəli hər oyunçuya son tarix deyəcək, ailə təsirində olanlarla məsafə saxlayacaq

Aydın məsələdi ki, Kilian Mbappenin çoxdan gözlənilən keçidinin alınmamasını “Real” ağır yaşayır. Madrid klubu bu yay berserka rejiminə keçmək fikrindədi. Yoxsa belə deyil?

“Real” üzrə ən məşhur insayderlərdən olan Ramon Alvaresin informasiyasına görə, artıq danışıqlar prosesinə münasibət dəyişəcək. Madrid klubu dərk edir ki, indiki reallıqlarda ilkin razılaşma hələ yekun uğura təminat vermir. Bundan sonra top səviyyəli hər oyunçuya müqaviləni imzalamaq üçün sərt son tarix deyiləcək. Əks halda “Real” özü danışıqlar prosesindən çıxacaq. Bu şərt xüsusən də azad agent statusu daşıyan futbolçulara aiddi.

Klub həmçinin ailəsinin hədsiz təsirinə məruz qalan futbolçularla məsafə saxlayacaq. “Real”da belə hesab edirlər ki, ailəsi Kiliana təzyiq edib, oyunçunun başı üzərindən PSJ-dən kosmik şərtlər qopara bilib. Bu üzdən Florentino Peres Mbappenin imtina qərarına belə reaksiya verdi:

Və bu da yeganə nümunə deyil. Holannın ailəsinin də danışıqlarla bağlı istəyi var idi. Erlinq “Real”a keçərsə, 170 milyon avro dəbbəpulu olmalıdı. “Real” anlayırdı ki, bu məbləğ ailəyə bir neçə il sonra başqa kluba keçəndə daha yaxşı müqaviləyə və imza parasına nail olmaq üçün lazımdı. Əsas məqam odu ki, “Real” Mbappenin PSJ-də qalmaq qərarı verməsini böyük problem saymır. Sadəcə, klub futbolçunun və ailəsinin işə yanaşmasından narazıdı, yəni onlar hədəflərinə çatmaq üçün “Real”dan yararlanıblar. Peres isə bununla mübarizə aparmaq fikrindədi.

Yayda heç bir superulduz olmayacaq

“Real” əvvəlcə Mbappe ilə Holannı birlikdə İspaniya paytaxtına gətirmək istəyirdi. Ancaq Kərim Benzemanın ideal forması üzündən norveçlidən imtina etmək lazım gəldi. Erlinq Kərimin ona əsas heyətdə oynamağa yer verməyəcəyindən, Kilianın isə diqqət mərkəzində olacağından çəkindi. “Mançester Siti” vaxtında araya girdi və Holannı daha bir il “Borussiya”da qalmaq üçün dilə tuta bildi.

• Mbappedən əli üzülən “Real” artıq öz oyunçularına köklənməyə məcburdu. Kilianın imtinasından dərhal sonra “Marca” klubun Rodriqo ilə müqavilə müddətinin uzadılmasıyla bağlı danışıq apardığı haqda xəbər yaydı. Ançelotti belə hesab edir ki, Rodriqo hələ maksimumuna çatmayıb və tezliklə dünya səviyyəli futbolçu ola bilər.

• “Real” üçün daha bir prioritet Vinisiusla müqavilə müddətini uzatmaqdı. Klub braziliyalının sadiqliyinə və fədakarlığına heyrandı. O, qeyri-adi mövsüm keçirdi və maaşının artırılmasını haqq etdi. Vini deyirdi ki, hətta ehtiyat oyunçuların maaşına da razıdı, ancaq “Real” ona ildə 10 milyon avro vermək və müqaviləsinə başqa kluba keçid haqqı kimi milyard avro yazmaq fikrindədi.

• Marselo ilə Qaret Beyl yayda gedir – onların nəhəng maaşı heyətin gücləndirilməsinə sərf olunacaq. Klub Eden Azar, Luka Yoviç və Marianonu da əldən vermək niyyətindədi. Onların əvəzində güclü mövsüm keçirən başqa oyunçuların (“Benfika”dan Darvin Nunyes, “Milan”dan Rafael Leau, “Leyptsiq”dən Kristofer Nkunku) transferi nəzərdə tutulur.

• Robert Levandovski və Harri Keyn ilə bağlı hələ ki heç bir plan yoxdu.

İndi əsas hədəf Çuamenidi

Cəmi bir həftə əvvəl “Monako”dan Orelyen Çuameninin fikri “Liverpul”un yanında idi, Fabinyo ilə rəqabətə hazırlaşırdı. Mbappe planının iflası vəziyyəti dəyişdi. Qəfil fəallaşan “Real” Çuamenini “qoparmağa” çalışır. Axı fransalı “Real” azarkeşidi və həmişə məhz Madriddə oynamağı arzulayıb.

• PSJ də Orelyeni istəyir. Ancaq futbolçu bundan sonra Fransada oynamaq fikrindən uzaqdı. O, ölkə xaricində oynamaq istəyir. Baxmayaraq ki, “Real”da Kazemironun sərt rəqabəti ilə üzləşəcək.

• Ancaq “Marca”nın yazdığına inansaq, Eduardo Kamavinqanın nümunəsi Orelyeni ruhlandırır. Ançelotti son mövsümdə ehtiyat oyunçular skamyasından olsa da, adı çəkilən futbolçuya yetərincə oynamaq imkanı yaradıb. “Monako” futbolçusuna görə 80 milyon istəyir, ancaq klubların 65 milyon üzərində dayanması tam mümkündü. Elə bu həftə sövdələşmə elan oluna bilər.

• Rüdigeri də unutmaq olmaz. İnsayder Fabritsio Romano yazır ki, klub çoxdan Antonio ilə 2026-cı ilin iyununa qədər müqaviləni razılaşdırıb. Bu transfer rəsmi şəkildə Çempionlar Liqasının finalından sonra elan olunacaq. Axı indi “Liverpul”la oyuna köklənmək lazımdı.