Kilian Mbappenin PSJ-də qalmayacağı dəqiqləşib. Fransa klubu Çempionlar Liqasında mübarizəni dayandırandan sonra onun gələcəyi ilə bağlı daha müfəssəl məlumatlar yayılıb.

Maraqlıdı ki, “Marka” qəzeti şənbə günü əvvəlcə onun bu həftə “Real”la müqavilə bağlayacağını xəbər verib. İspaniyanın populyar idman nəşrinin iddiasına görə, tərəflərin bütün məsələlərdə cümə gününə qədər razılığa gəlməsi gözlənilir. PSJ-ni azad agent kimi tərk edəcəyi çoxdan gözlənilən Kilianın “Real”a transferinin isə rəsmən mövsümün sonunda açıqlanacağı qeyd edilib.

Amma “Marka” çox keçmədən çoxlarını maraqlandıran mövzu ilə bağlı növbəti xəbəri yayıb. Populyar qəzet bu dəfə Mbappenin “Real”la hələ yanvarın 30-da müqavilə bağladığını iddia edib. Jurnalist Ramon Alvares 23 yaşlı hücumçunun İspaniya klubundan imza sənədi üçün təxminən 60-80 milyon avro bonus və ilə 25 milyon avro maaş alacağını da xəbər verib. O, Mbappenin hələ bir neçə ay əvvəl “Real”a məhz bu kluba keçəcəyi ilə bağlı söz verdiyi üçün bonusla mükafatlanacağını qeyd edib.