“Araz-Naxçıvan”ın “lipaları” baş verənlər haqda danışdı - AÇIQLAMALAR
Region Liqasının yarımfinalı çərçivəsində baş tutan “Xan Lənkəran” - “Araz-Naxçıvan” görüşündə naxçıvanlıların peşəkar müqaviləsi olan iki futbolçunun xidmətindən yararlandığı üçün texniki məğlubiyyətlə üzləşdiyindən xəbəriniz var.
Azər Bağırovun çalışdırdığı komandanın heyətində Orxan Əliyevlə Elməddin Məmmədovun cari mövsüm ərzində peşəkar müqaviləsinin olması Muxtar Respublika təmsilçisini finaldan məhrum edib.
Məsələ ilə bağlı qəzetimizə açıqlama verən Region Liqası üzrə İşçi qrupun üzvü, AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyev başverənlərə görə “Araz-Naxçıvan”ın məsuliyyət daşıdığını söyləyib:
“Region Liqasının nizamnaməsi var. Klub rəhbərləri bu nizamnamə ilə tanış olub, qol çəkəndən sonra turnirdə iştiraka icazə verirlir. Nizamnamənin müvafiq bəndində açıq şəkildə qeyd olunub ki, komandaların heyətində peşəkar futbolçu statusu daşıyanlar yer almamalıdı. Buna əməl etməyən klub birbaşa məsuliyyət daşıyır. “Araz-Naxçıvan" bu qaydanı kobud şəkildə pozaraq texniki məğlubiyyət alıb. Problem yalnız Elməddin Məmmədovla bağlı olsaydı, düşünürəm ki, İntizam Komitəsi fərqli qərar verə bilərdi. Çünki futbolçu 1 ildi klubsuzdu. Amma Orxan Əliyev hansısa peşəkar klubla müqaviləsi ola-ola, "Araz-Naxçıvan"ın heyətində çıxış edib. Bu isə kobud qanun pozuntusudu və məsələdə məsuliyyət klubun üzərinə düşür”.
Adı “lipa” kimi hallanan futbolçularla da danışmağı lazım bildik. “Araz-Naxçıvan”ın “çərçivə qoruyucusu” Elməddin Məmmədov heç bir günahının olmadığını söylədi:
“Peşəkar müqaviləmin müddəti bir il öncə başa çatıb. Bu səbəbdən məni “lipa” adlandırmaq düzgün deyil. Naxçıvan çempionatında da bir neçə oyuna çıxmışam. Ancaq onda mənə heç kim heç nə deməyib, qanunsuzluğa yol verdiymizi bildirməyiblər. Bu gün (dünən) AFFA-dan mənimlə əlaqə saxlayıb heç bir iradlarının olmadığını dedilər. Adım çəkilsə də, mənlik heç nə yoxdu. Özlərindən nəyə əsaslanıb məni “lipa” kimi qəbul etdiklərini soruşmuşam. Çox şey danışırlar, ancaq ortaya konkret fakt qoymurlar. Bu gün də dedilər ki, sənə yox, Orxan Əliyevə görə bu qərar qəbul olunub. Əslində bizə bu barədə danışmağa qadağa qoyulub. Ancaq mən də haqq-ədalətin zəfər çalmasını istəyirəm”.
Əlaqə saxladığımız Orxan Əliyev isə danışmasına qadağa qoyulduğunu söylədi:
“Başverənlərlə bağlı klub rəhbərliyi tərəfindən mənə danışmağa icazə vermirlər. Deyiblər ki, yaxın vaxtlarda özümüz lazımi açıqlamanı verəcəyik. Ona görə də məni üzürlü sayın”.
RƏŞAD
Digər xəbərlər
