"O futbolçuların meydanda olmağa ixtiyarları yox idi"
Mayın 15-də Region Liqasının yarımfinal mərhələsi çərçivəsində “Xan Lənkəran”la “Araz-Naxçıvan” arasında keçirilən oyunda Naxçıvan təmsilçisi rəqibini 2:1 hesabı ilə məğlub edərək adını finala yazdırdı.
Qarşılaşmadan sonra cənub klubunun prezidenti Pərviz Hüseynov rəqibin heyətində meydanda peşəkar futbolçuların çıxış etdiyini bildirdi. Cənublular Azər Bağırovun çalışdırdığı komandadan AFFA-nın İntizam Komitəsinə şikayət məktubu da göndərdilər. Amma Naxçıvan təmsilçisinin baş məşqçisi qəzetimizin ötən sayına açıqlamasında “Xan Lənkəran”ın iddiasını əsassız adlandırdı: “Vadim Abdullayev və Elməddin Sultanovla (soyadda səhvə yol verir, Məmmədov olmalıydı – red.) bağlı problem yaradırlar. Deyirlər ki, peşəkar statusları var. Mən “Araz-Naxçıvan”a gələndə mart ayı idi. İndi də mayın günlərini yaşayırıq. Biz bu futbolçuların adını federasiyaya təqdim etmişik. Onların peşəkar statusu olsaydı, həmin vaxt problem yaranardı. Vadim də, Elməddin də 2011-dən bəri hansısa çempionatda çıxış etməyib. Rəqibi başa düşürəm. Amma oyunu uduzandan sonra belə şeylərin ortaya atılması gülüncdü. “Araz-Naxçıvan”a böyük hesabla qalib gəlməli olan komanda indi belə bəhanələr axtarır. Bu məsələdə haqlı tərəfik. Elməddin 2021-ci ilin mayından Azərbaycandadı. Uzun müddətdi klubsuzdu. Vadim də həmçinin. Onlar Azərbaycanda heç bir peşəkar klubda oynamayıblar. UEFA-nın da qaydalarına görə bir futbolçu 2 ay maaş almadısa, artıq həvəskar statusu daşıyır”.
PRO kateqoriyalı mütəxəssisin bu tutarlı açıqlamasından sonra əksəriyyət “Xan Lənkəran”ın iddiasının əsassız olduğunu düşündü. Lakin İntizam Komitəsinin ötən gün açıqlanan qərarından sonra vəziyyət kəskin dəyişdi. Belə ki, qurum “Xan Lənkəran”la “Araz-Naxçıvan” arasındakı oyundan sonra aparılan araşdırma zamanı Naxçıvan təmsilçisinin heyətində çıxış edən futbolçulardan Orxan Əliyevlə Elməddin Məmmədovun cari mövsüm ərzində peşəkar müqaviləsinin olduğunu müəyyənləşdirdiyini, bu səbəbdən də “Araz-Naxçıvan”a 0:3 hesablı texniki məğlubiyyət verildiyini bəyan etdi. Beləliklə, Region Liqasının final matçının “Cəbrayıl” və “Xan Lənkəran” arasında Şamaxı şəhər stadionunda keçiriləcəyi də elan olundu.
Amma bizi düşündürən üç nüans var:
1. “Araz Naxçıvan”ın baş məşqçisi oyunlardan öncə iştirak ərizəsini müvafiq quruma göndərdiyini, belə hal olsaydı, onlardan cavab gələcəyini qeyd edir. Bu hal da yaşandı. Görəsən, bu AFFA-nın diqqətindən yayınıb?
2. “Xan Lənkəran” iddiasında Elməddin Məmmədovla Vadim Abdullayevin adını çəkmişdi. İntizam Komitəsinin qərarında isə Vadimin əvəzinə Orxan Əliyevin adı yazılıb. Bu futbolçuların hansı klublarla peşəkar müqaviləsi var?
3. Əsəsnaməni kobud şəkildə pozan “Araz-Naxçıvan”ın “Qusar”la 3-cü yer uğrunda matçı oynamasına icazə veriləcək? Yoxsa bürünc mükafatçı şimal bölgəsinin təmsilçisi olacaq?
Suallarımıza cavab tapmaq üçün AFFA-nın İntizam Komitəsini rəhbəri Erkin Hüseynovla əlaqə saxlamağı lazım bildik: “Region Liqasının Əsasnaməsində peşəkar futbolçunun meydana buraxıla bilməyəcəyi ilə bağlı maddə var. “Araz-Naxçıvan” da bunu pozub. Peşəkar oyunçuları yarımfinalda oynadıblar. Bunlar Orxan Əliyevlə Elməddin Məmmədovdu. Hətta onlardan biri qol da vurub. Özləri də səhvlərini yaxşı bilirlər. O futbolçuların meydanda olmağa ixtiyarları yox idi. Qarşı tərəfin bizə göndərdiyi məktubda bu iki oyunçunun ölkə xaricində oynadığı klubların adı da qeyd olunub. Onların peşəkar futbolçu kimi klubları ilə müqavilələri var. İntizam Komitəsi kollegial orqandı. Araşdırma aparmadan, kor-koranə heç bir şey edə bilmərik. Bu məsələni də araşdırdıq və məlum oldu ki, həmin futbolçular peşəkar statusa malikdi. Buna görə də “Araz-Naxçıvan”a texniki məğlubiyyət verildi. Matçlarda iştirak edəcək futbolçularla bağlı sənəd də bizə yox, Region Liqasının təşkilatçılarına gedir. Mümkün deyil ki, onlar bu adları görüb araşdırma aparmasın. Bütün oyunçulara baxılır ki, orda qaydalara zidd hal yaşanmasın. Konkret araşdırma aparılıb. “Araz-Naxçıvan”a yalnız yarımfinal oyununda qaydaları pozduğuna görə texniki məğlubiyyət verilib. Ona görə də komandanın “Qusar”la bürünc medal uğrunda görüşə çıxması yolunda heç bir əngəl yoxdu. Bu qərar yalnız “Xan Lənkəran”la qarşılaşmada baş verən hadisə səbəbindən qəbul olunub”.
Digər xəbərlər
