Ağır zədədən hələ ötən il qayıtmasına baxmayaraq, “'Everton”'da heç cür özünü göstərə bilməyən və bu mövsüm cəmi 3 rəsmi oyuna çıxan Cenk Tosun Türkiyə mətbuatına açıqlamalar verib.

Müqavilə müddəti bitmək üzrə olan təcrübəli forvard 2018-in yanvarından bəri şərəfini qoruduğu “Everton”dan ayrılacağını rəsmən açıqlayıb:

“'30 yaşım var. Karyeramın ən yaxşı dönəmində ardıcıl iki il ağır zədə yaşadım. Amma bunların hamısını geridə buraxmışam. 1 aydı durmadan məşq edirəm və oynamağa tam hazıram. Fiziki cəhətdən heç vaxt olmadığı qədər yaxşı formadayam. Azad agent statusunda olan bir futbolçuyam. Yeni klubumda güclü bir mövsümöncəsi toplanış dönəmi keçdikdən sonra əvvəlki oyunumu sərgiləyəcəyimi düşünürəm. Amma çempionluq hədəfi olan, ən azı avrokuboklara can atan bir klubda oynamaq istəyirəm. O həyəcanı yaşamaq üçün çox darıxmışam. Atam və menecerim ilə birlikdə ən yaxşı variantı seçəcəyik. Türkiyəyə qayıtsam, mövsümə ən azı 15 qol vuraram. Bu yay İngiltərədən yüz faiz ayrılacam. Çünki başqa təkliflər iddialı klublardan deyil. Hazırda İngiltərədəki evimdə əşyalarımı toplamaqla məşğulam. Məsələ pulda deyil. Dediyim kimi, iddialı bir klubda oynamaq istəyirəm. Mənim üçün bu şərtlər artıq İngiltərədə yoxdu. “Trabzonspor”u və Abdulla Avcını təbrik edirəm. Superliqada gözəl və layiqli bir çempionluq əldə etdilər. Rıdvan Yılmaz, Ərsin Destanoğlu, Kərəm Aktürkoğlu, Arda Gülər, Əmirhan İlkhan kimi gənclər Türkiyə futbolunun gələcəyidi. Onlarla bağlı böyük ümidlərim var. Ötən il “Everton” rəsmiləri məndən Türkiyədə izləniləsi gənc bir istedad soruşmuşdular. Mən də onlara Arda Güləri məsləhət görmüşdüm. Kərəm bu mövsüm yeni səviyyəyə yüksəlsə də, məncə, “Qalatasaray”da daha bir il qalıb Avropaya yollanmalıdı. Türkiyə ilə Avropa futbolu arasında böyük fərq var. Ona görə də oyunçularımız fiziki və psixoloji cəhətdən tam hazır olandan sonra Avropaya getməlidi. Mən “Beşiktaş”a 27 milyon avro qazandıraraq ayrıldım. İnşallah, sonrakı nəsil 57, 87, hətta 107 milyon qazandırar. Mən özümü daha çox ÇL matçlarında göstərməyə müvəffəq oldum. Yəni oyuncularımızın daxili turnirlərdən çox avrokuboklardakı performansı həlledici olur. Ümid edirəm ki, Avropaya daha çox oyunçu göndərəcəyik. Burak Yılmaz Türkiyə futbolunun gəlmiş-getmiş ən güclü hücumçularından biridi. Futbolumuza böyük töhfə verib. Yığma ilə daha yaxşı şəkildə vidalaşmağa layiq idi. Heç olmasa, bir nəhəng turnirdən sonra vidalaşsa, daha yaxşı olardı. Qismət deyilmiş. Onun yaşına qədər yığmada oynayıb-oynamayacağımı zaman göstərəcək. Artıq yığmanın ən təcrübəli ismi mənəm, bir də Hakan Çalhanoğlu. Qətərdəki mundiala qatılmaq üçün əlimizdən gələni etsək də, alınmadı. Artıq olan olub. Diqqəti növbəti nəhəng turnirə yönəltməliyik. Bu il “Qızıl top”un səsverməsində iştirak etsəm, mütləq birinci yeri Benzemaya verəcəm. Çünki buna layiqdi. Keçən il də Levandovski layiq idi. “Everton”da ötən mövsüm məşqçim olmuş Karlo Ançelotti “Real”da inanılmaz işlər görür. ÇL-i qazanmağa layiqdi. Ançelotti burda işləyərkən münasibətlərimiz çox yaxşı idi. Amma finala yüksəlmələri münasibətilə zəng vurub təbrik edə bilməmişəm”.