“Çelsi” fanatları klubu almaq istəyən ailəyə nifrət edir
Rusiyanın Ukraynaya təcavüzünə görə Roman Abramoviçə tətbiq edilən sanksiyalar üzündən sahibsiz qalan “Çelsi” yaxınlarda satılmalıdı.
Klubu almağa əsas iddialılardan biri də Rikketslər ailəsidi. Amma azarkeşlərin bu ailəni görən gözü yoxdu və etiraz aksiyalarına başlayıblar. Onların əsas iradı ailə başçısının müsəlmanlara nifrəti ilə bağlıdı. “Brentford”la oyundan (1:4) əvvəl azarkeşlər London küçələrinə “Çelsi”ni Rikketslərə verməməyə çağıran plakatlarla çıxıblar. Rikketslərin əleyhinə olan onlayn petisiyaya 20 mindən artıq adam imza atıb. Səbəb isə odu ki, ailənin 80 yaşlı başçısı Co Rikkets köhnə elektron məktublarının birində müsəlmanları özünə düşmən adlandırıb.
“Çelsi” fanatlarının aparıcı birliyi olan “Chelsea Supporters’ Trust”ın keçirdiyi sorğunun nəticələri etirazların səbəbini izah edir. Azarkeşlərin əksəriyyəti (70 faizdən çoxu) Rikketslərin ərizəsini dəstəkləmir – bu ailənin inklüziv və uğurlu kluba rəhbərlik edə biləcəyinə inanmırlar. Fanat qrupunun bəyanatında o da vurğulanır ki, “Çelsi”nin heyətində islam dininə sitayiş edən yetərincə futbolçu var.
Komandanın baş məşqçisi Tomas Tuxel də fanatları dəstəkləyib:
“Özünüzə belə açıqlamalar verməyi rəva görürsüzsə, fəsadları ilə də üzləşməli və məsuliyyət daşımalısız. Fəsadlardan biri azarkeşlərin etirazı olacaqsa, bununla barışmalısız”.
Müsəlmanlara nifrəti necə üzə çıxıb?
2019-cu ildə Co Rikketsin 2009-13 aralığında göndərdiyi elektron məktublar sosial şəbəkəyə sızmışdı. Həmin yazışmadan bir sitatı xatırladırıq:
“Təbii ki, müsəlmanlar qeyri-müsəlmanlar ilə münasibətlərdə dərin antaqonizmə və qərəzə görə mənim düşmənlərimdi”.
“İslam kultdu, din deyil, onun cəmiyyətimizin böyük hissəsi olmasına heç vaxt yol veri bilmərik” – bu da Rikketsin ifadələrindən biridi. “Çelsi” azarkeşləri Rikketsin keçmişindən operativ şəkildə xəbər tutaraq dərhal #NoToRicketts həştəqi ilə sosial şəbəkələrdə kampaniyaya başlayıblar. Komandanın sabiq oyunçusu, “Çelsi” tarixinin ilk qaradərili futbolçusu Pol Kanovil də azarkeşləri dəstəkləyib:
“Yetərincə çox şey görmüşəm və eşitmişəm, odu ki, Rikketslərin ərizəsinə böyük antiirqçi “yox” deyirəm”.
Ailənin Londona səfər edərək azarkeşlərlə görüşməsi də münasibətləri yoluna qoymayıb.
Onlayn-treydinq hesabına sərvət yığıblar
Rikketslər “Forbes” jurnalının sərvətini 4,5 milyard dollar həcmində dəyərləndirdiyi, Çikaqodan olan ailədi. Co Rikkets bu sərvətə onlayn-treydinq hesabına yiyələnib. Ailənin idman komandasını idarə etmək təcrübəsi də var – 2016-da Dünya seriyasını qazanan “Çikaqo Kabs” beysbol klubunun səhmlərinə nəzarət paketinə yiyələniblər.
Rikketslər sifariş ərizəsində təminat veriblər ki, ailənin patriarxı sövdələşmədə iştirak etməyəcək. 2019-a təsadüf edən, yuxarıda xatırlatdığımız qalmaqaldan sonra Tom (Conun oğlu və ərizəni yazan əsas adam) vurğulamışdı ki, atasının “Çikaqo Kabs”ın idarəçiliyinə qətiyyən qarışacağı yoxdu:
“Bizim cəmiyyətdə irqçiliyə və islamofobiyaya yer yoxdu. Çikaqodakı müsəlman icması ilə dərin və möhkəm tərəfdaşlıq münasibətləri qurmuşuq”.
Ailənin sifariş ərizəsində amerikalı milyarder Ken Qriffinin daxil olduğu səhmdarlar qrupu da yer alıb. Əsas bəndlərdən biri “Çikaqo Kabs”ın ev oyunlarını keçirdiyi “Riqli Fild” stadionunun uğurla yenidən qurulmasıdı. Ailə belə hesab edir ki, bu məsələdəki təcrübələri köhnəlmiş “Stemford Bric”ə müasir görkəm verməkdə işə yarayacaq. Ancaq fanatların son etiraz aksiyaları bunu deməyə əsas verir ki, Rikketslərin “Çelsi”yə yiyələnməsi asan olmayacaq
Digər xəbərlər
