“Çelsi”nin sahibi Roman Abramoviç ABŞ-İsveçrə konsorsiumunun klubu almaq üçün etdiyi təklifi geri çevirib. Bu haqda “İndependent” məlumat yayıb.

Qəzetin yazdığına görə, rusiyalı biznesmenin belə qərara gəlməsinə qarşı tərəfin kifayət qədər məbləğ ödəmək istəməməsi səbəb olub. Abramoviç əvvəlki kimi “Çelsi” üçün təxminən 4 milyard avro tələb edir. London klubunu almaq istəyənlər arasında milyarderlər Hansyorq Viss və Todd Boeli də diqqəti cəlb edir. Onlar çərşənbə axşamı “zadəganlar” üçün rəsmi təklif göndəriblər.

Yeri gəlmişkən, “Çelsi”nin azarkeşi olan Nik Kendi və qardaşı da klubu almaq istəyir. “The Telegraph” qəzetinin məlumatına görə, 49 yaşlı Kendi konsorsium yaradaraq klubu satışa çıxaran Abramoviçə 2,5 milyard funt sterlinq təklif edib. O, “Çelsi”nin ev oyunlarını keçirdiyi “Stemford Bric” stadionunu yenidən qurmağı da öhdəsinə götürüb. Rusiyalı biznesmen isə klubu azı 3 milyard funt sterlinqə satmaq istəyir. Hazırda Abramoviçin 10-dan çox təklif aldığı bildirilir. Klubu almaq istəyənlər arasında UFC-nin iki çəki dərəcəsi üzrə sabiq çempionu Konor Makqreqor da var.