Böyük Britaniya hökuməti “Çelsi”nin sahibi Roman Abramoviçə və kluba sanksiyalar tətbiq edib.
Rusiyalı biznesmenin klub da daxil olmaqla krallıqdakı bütün aktivləri “dondurulub”. Bu isə o anlama gəlir ki, son günlərdə “Çelsi”yə alıcı axtaran 55 yaşlı iş adamı klubu sata bilməyəcək. Amma sanksiya klubun fəaliyyətini davam etdirməsinə mane olmayacaq. “Çelsi” bunun üçün xüsusi lisenziya alıb.
İstənilən halda “zadəganlar” üçün müəyyən problemlər ortaya çıxacaq. Çünki kluba ev oyunlarına bilet satmaq yasaqlanıb. Başqa sözlə, tribunalara yalnız mövsümlük abunə biletlərinin sahibləri buraxılacaq. Digər qadağa isə yeni oyunçuların transferi və futbolçularla müqavilələrin yenilənməsinə tətbiq olunub. Artıq klubun mağazalarının bağlandığı da xəbər verilib.