Rusiyanın Ukraynaya hərbi müdaxiləsinin davam etməsi “Çelsi”ni növbəti sanksiyalara məruz qoyub.

London klubunun bank hesabları müvəqqəti olaraq “dondurulub”. “Barclays” başda olmaqla Böyük Britaniyanın bankları klubun hesablarını bloklayıb. Buna səbəb kimi yerli hökumətin “Çelsi”nin sahibi Roman Abramoviçə qarşı sanksiyalar tətbiq etməsi göstərilib. Klubun fəaliyyətini davam etdirməsi üçün verilən lisenziyaya yenidən baxılması mümkündü. Buna baxmayaraq, “Çelsi”nin bir sıra korporativ hesabları, o cümlədən kredit kartları “dondurulub”. Ona görə ki, banklar mövcud vəziyyətdə riskə getmək istəmirlər.

Yeri gəlmişkən, bəzi futbolçular kluba qoyulan qadağalar səbəbindən “Çelsi”ni tərk etmək istəyirlər. “The Telegraph”ın məlumatına görə, bir sıra oyunçular həm də Abramoviçə tətbiq edilən sanksiyalar üzündən klubun bank hesablarının bloklanmasına, transfer qadağası almasına və bilet satışını reallaşdıra bilməməsinə görə narahatdılar. Onlar komandanın maliyyə vəziyyətinin pisləşəcəyini düşünürlər.

“The Telegraph” onu da qeyd edir ki, adı açıqlanmayan oyunçuların menecerləri müştərilərinin müqavilələrinə xitam verilməsi imkanlarını müzakirə etmək üçün vəkillərlə əlaqə saxlayıblar. Klub maaşları gecikdirməyə başlayarsa, futbolçular tərəfindən müqavilənin pozulması variantı nəzərdən keçirilir.