Nəhayət, “Lokomotiv”in yeni baş məşqçisi məlum olub.

Komandada bir aydan çox davam edən problem aradan qaldırılıb.

Rusiya klubunun rəsmi saytının xəbərinə görə, komandanı bundan sonra Zaur Xapov çalışdıracaq. Onunla bağlanan müqavilənin detalları açıqlanmayıb. 57 yaşlı mütəxəssis baş məşqçi vəzifəsində Rusiyanın Ukraynaya hərbi müdaxiləsindən sonra istefa verən Markus Gisdolu əvəzləyib. Xapov 2016-cı ildən “Lokomotiv”də qapıçılar üzrə məşqçi işləyirdi.

Hazırda Rusiya premyer-liqasında 22 oyuna 37 xalla turnir cədvəlinin 5-ci pilləsində qərarlaşan komandada daha bir neçə dəyişiklik baş verib. Aleksandr Səmədov Moskva klunundan ayrılıb. Rusiya yığmasının sabiq oyunçusu “Lokomotiv”in gənclər komandasının baş seleksiyaçısı vəzifəsini tərk edib. Onun klubla müqaviləsi qarşılıqlı razılıq əsasında ləğv edilib. 38 yaşlı Səmədov seleksiyaçı vəzifəsinə 2021-ci ilin yanvarında təyin olunmuşdu.

“Loko”nun əsas komandasının məşqçi korpusunu isə iki mütəxəssis tərk edib. Dmitri Loskov ilə Oleq Paşininə klubun strukturunda vəzifə veriləcəyi, onların gənc futbolçularla işləyəcəyi xəbər verilib.