“Bu, bütün dünya klubları üçün keçərlidi ki, futbolçuları diqqəti çəkəcək, maraqlananlar olacaq və aldığı maaşdan daha yaxşı pul təklif olunacaq. Futbolçu da əksər hallarda belə təklifə razılaşır. Buna maraqların toqquşması deyirlər. Klub da çətin vəziyyətə düşməkdən “sığortalanmayıb”. Qaydalar belədi ki, klub futbolçuya “elçi düşərkən” ilk növbədə onun klubu ilə danışmalıdı, razılığa gəlməlidi. Bundan sonra şərtləri futbolçu və ya agenti ilə danışmalıdı. Amma bu qanun işləmir. Demək olar ki, mümkün deyil. Heç bir klub oyunçunun fikrini bilmədən başqa klubla danışıq aparmayacaq. Hər şey əksinə olur. İndi agentlər oyunçu ilə danışandan sonra klubu ilə danışıqlara keçirlər. Futbolçu da onu istəyən klubun tərəfində olur. Bu məqam Qurban Qurbanovu narahat edə bilər, etməlidi də. “Qarabağ” da, digər klublar da futbolçu alarkən eyni prinsipə əməl edirlər, etməlidi də. Çünki qaydalarda göstərilən kimi olsa, yəni klubdan icazə alıb, razılaşıb sonra futbolçu ilə danışıq aparılsa, mümkün ola biləcək transferlərin də böyük faizi mümkünsüzə çevriləcək. Klub bəlkə də kimisə satmaq istəmir, amma oyunçu getmək istəyir. Buna görə də futbolçunun agenti ilə danışmaq məcburiyyətində qalırlar. Bunu kluba hörmətsizlik kimi dəyərləndirməyin əleyhinəyəm. Çünki futbolçunun əlindəki müqavilə ona ciddi səlahiyyət verir. Ola bilər ki, klub satmaq istəməsin. Şəxsi fikrim budu ki, FİFA-nın qaydalarındakı müəyyən maddələr, insan hüquqları klubun hansısa oyunçunu “müqaviləsi var, satmıram” deməsi, saxlamaq istəməsi düzgün deyil. Müqaviləyə görə müəyyən məbləğ tələb edə bilərsən. Məbləğ adekvatdı, yoxsa məntiqlidi deyil - bu da başqa mövzudu. Klubun satmamaq istəyi maraqların toqquşmasıdı. Çünki futbolçu da getmək istəyir. Küsəcək, motivasiyasına təsir edəcək. Təəssüf ki, bunlar qaçılmazdı. Qurban müəllimin dediyi bir fikirlə razılaşmalıyam. Deyir ki, transfer etmək istəyən klublar oyunçuya yaxşı şərt təklif etsə də, kluba aşağı məbləğ təklif olunur. Alan klub başa düşür ki, məsələn, futbolçu 300 min qazanırsa, heç 350 minə də razılaşan deyil. Ona görə də ən azı 20-30 faiz daha artıq maaş təklif edir. Kluba edilən təklifin isə müqayisəsi yoxdu. Məsələn, “Neftçi”dən futbolçu almaq istəyirəm. Bazar qiyməti deyilən bir şey yoxdu. “Neftçi” İqor Ribeyronun transferindən çalışacaq ki, çox pul qazansın, onu almaq istəyən klub isə az məbləğ ödəməyə çalışacaq. Bu ciddi müzakirə mövzusudu. Bəzi hüquqşünaslar bu məsələni qabardır, FİFA nizamnaməsinin nizamlanmasını istəyir. Adi həyatda bir insan işlədiyi işi rahatlıqla dəyişə bilər. Amma futbolda belə deyil. Belə qayda olsa, agentlər, futbolçular, klublar bundan yararlanmağa çalışacaq. Bu məsələ gedir. Ola bilər ki, uzun olmayan müddətdən sonra bu qayda qüvvəyə minsin. Bu məsələdə həmişə narazı, inciyən, küsən tərəf olacaq. Çünki qaydalarda konkretlik yoxdu. Ədaləti nizamlamaq deyə bir şey də yoxdu. “Qarabağ”ın çətinliyi ikiqatdı. Status məsələsi də önəmlidi. Başqa ölkələrin klubları Azərbaycandan bir futbolçu almaq istəyəndə bizim bazarı ucuz qiymətləndirir. “Qarabağ”dan futbolçu almaq istəyir, ağdamlıların 2-3 milyon pul tələb etdiyini görəndə təəccüblənirlər. Hətta Şərqi Avropada, Polşada o futbolçu səviyyəsində başqa birinin qiyməti iki-üç dəfə baha olur. Buna hazır olurlar. Azərbaycanda çıxış edən futbolçu da bunu başa düşmək istəmir. İzah etmək olmur ki, səni 1 milyona istəyirlər, amma sənin səviyyəndə futbolçunun Polşada qiyməti 3 milyondu. Bu məqam futbolçuya kobud dildə desəm, maraqlı deyil”.