“Qarabağ” azarkeşləri sevinə bilər. Uzun müddətdi zədəli olan Marko Veşoviç sağalıb və artıq kollektivlə məşqlərə başlayıb. Bu məlumatı klubun mətbuat katibi Anar Hacıyev də təsdiqləyib.

Bəli, sevindirici məqamdı. Monteneqrolu futbolçu ən azı avrokuboklarda “Qarabağ”a çox yardım edə bilər. Lakin düşündürücü bir məsələ var. Xatırlayırsızsa, “Həkken”lə görüşdən öncə Qurban Qurbanov mətbuat konfransında jurnalistin “Marko Veşoviçi nə vaxt heyətdə görəcəyik” sualını belə cavablamışdı: “Hələ ki komandaya qoşulmayıb, fərdi məşqlərə başlayıb. Meydanlara qayıtması xeyli vaxt alacaq. Böyük ehtimalla, bir ay olmayacaq”.
Bu açıqlama oktyabrın 4-də verilib. Bu gün isə ayın 17-di. 13 gün ərzində Marko Veşoviç sağaldı? Nə baş verdi ki, monteneqrolu birdən-birə oynamağa hazır oldu? Qəribə durumdu. Belədə ortaya üç fikir çıxır: ya Qurban Qurbanov futbolçusun durumundan xəbərdar deyil, ya həkim məşqçilər heyətinə yanlış məlumat verib, ya da Veşoviçlə bağlı başqa problem var.

Qurban Qurbanovu illərdi tanıyırıq. Ölkə futbolu ilə dərindən maraqlanan hər kəs bilir ki, çalışdırıcı hansısa mövzuda açıqlama verəndə maksimum ehtiyatlı olmağa çalışır. İstəyir ki, jurnalistlərə dolğun və dəqiq informasiya versin. Yəni Qurbanovun futbolçusunun gerçək durumundan xəbərdar olmaması mümkünsüzdü.

Deməli, klubun tibbi personalı baş məşqçiyə yanlış informasiya verib. Bunun müqabilində də Qurban bəy mətbuat konfransında deyib ki, Veşoviç bir ay sonra meydana çıxa biləcək. “Qarabağ”ın həkimi Səhhət Rüstəmzadəni də işinin peşəkarı kimi tanıyırıq. Lakin son vaxtlar Ağdam təmsilçisinin üzvlərinin tez-tez zədələnməsi, futbolçuların ayaqlarında ağrıların olması şübhə doğuran məqamdı. İnsan düşünməyə də bilmir. Görəsən, “Qarabağ”ın oyunçularında nə üçün tez-tez mikrozədələr olur? Bəlkə tibbi personal və ya konkret həkim səhv diaqnoz qoyur? Bu həyatdı, hər şey ola bilər.
Gələk üçüncü versiyaya, yəni Veşoviç hansısa başqa problemin olmasına. Bu ehtimalı, ümumiyyətlə, düşünmək istəmirik. Ümid edirik ki, belə bir şey də yoxdu. Hər halda, monteneqrolu yarımmüdafiəçi sağalıb. “Turan Tovuz”la matçda meydana da çıxa bilər. Ümid edək ki, Veşoviç güclü orqanizmə sahibdi, düzgün müalicə aldığına görə gözləniləndən tez sağalıb və “Bayer-04” ilə oyunlarda komandasına kömək edəcək.

İLKİN SULTANLI