Ölkəmizi Çempionlar Liqasında təmsil etməyə hazırlaşan “Sabah” heyətini gücləndirməkdədi. Daha əvvəl Eyden Makkarti və Yunis Laçabla müqavilə imzalayan "bayquşlar"ın üçüncü transferi Junior Erivaldo Almeyda olub. Masazır təmsilçisi braziliyalı müdafiəçiylə 3 illik razılıq əldə edib.

"Football-plus.az"ın məlumatına görə, 26 yaşlı futbolçu Portuqaliya “Maritimu”sundan transfer edilib. Mərkəz müdafiəçisi karyerası ərzində Braziliyanın “Novorizontino” (2020-23), “Katanduva” (2021), “Votuporanguense” (2022), Portuqaliyanın “Eştrela Amadora” (2022-23) və “Maritimu” (2024-26) komandalarında oynayıb.

Almeyda 189 sm boya malikdi. Onun "Transfermarkt"dakı dəyəri 400 min avrodu. Müdafiəçi 2025/26 mövsümündə Portuqaliyada 2-ci liqada 9, ölkə kubokunda 1 oyun keçirib. Bu oyunların 5-də mübarizəyə start heyətində başlayıb. Futbolçu bu matçlarda cəmi 610 dəqiqə meydanda olub. Qol və məhsuldar ötürməylə yadda qalmayan Almeyda 3 dəfə sarı vərəqəylə üzləşib.

Xatırladaq ki, "Sabah" mövsümlərarası fasilədə Cesse Sekidika, Pavol Şafranko, Nicat Mehbalıyev və Amin Seydiyev ilə vidalaşıb.

KƏNAN BAHADIR