Dünya çempionatında F qrupu çərçivəsində Niderland ilə Yaponiya 2:2 bərabərə qalaraq turnirə 1 xalla başladılar.

Oyunu şərh etmək üçün Yaponiyanın bir kanalına ekspert qismində dəvət olunan yaponiyalı ulduz Keisuke Hondanın işlətdiyi qəribə ifadələr sosial şəbəkələrdə böyük müzakirələrə səbəb olub. Məlum olduğu kimi dünyanın bir çox ölkəsində top qovmuş Hondanın yolu ölkəmizdən də keçib. O 2021-ci ildə qısa müddət ''Neftçi''də top qovub. İyunun 13-də 40 yaşı tamam olmasına baxmayaraq o hələ də karyerasını davam etdirir.

Honda əvvəlcə ilk yarıda su fasiləsi zamanı nə baş verdiyini anlamadı və təəccübünü gizlədə bilmədi. Halbuki bu, mundialın artıq 10-cu oyunu idi və əvvəlki 9 qarşılaşmanın hər birində iki dəfə su fasiləsi verilmişdi. Yayının gedişində o, VAR sözünü yanlış anlayaraq VTR kimi oxudu.

Ən çox təəccüb doğuran məqam isə Hondanın Niderlandın ulduzlarını tanımaması oldu. O, sağ cinahda oynayan Denzel Dyumfrisin performansını bəyənincə matçın şərhçisindən bu futbolçunun kim olduğunu soruşdu. Cavabı öyrəndikdən sonra isə təəccübünü gizlədə bilmədi. Daha sonra şərhçiyə ''11 nömrə öz oyunu ilə adamı əsəb edir. Onun adı nədi'' sualını ünvanladı və beləcə ''Liverpul''un ulduzu Kodi Qakponu tanımış oldu.

Növbəti dəqiqələrdə Qakponun boyunun 193 sm olduğunu öyrəndikdən sonra isə yenə təəccübünu gizlədə bilmədi və ''193 santimetrlik vinger olur? Bu matçda Niderlandın ən təhlükəli oyunçuları birinci Qakpo, ikinci Qakpo, üçüncü Qakpo, dördüncü De Yonqdu'' dedi. Kameralar bir neçə dəfə tribunada əyləşən qadın restlinqçi Liv Morqanı göstərdikdə Honda özünü saxlaya bilməyərək şərhçidən bu xanımın kim olduğunu soruşdu.

Onun 40-cı dəqiqədə ''dünya çempionatını izləmək çox yorucudu. Hələ yalnız 40-cı dəqiqə gedir'' ifadəsi də diqqət çəkdi.