“Arsenal” büdrədi, “Liverpul” darmadağın oldu - İCMAL
Premyer-liqanın 11-ci turu çox məhsuldar və maraqlı alındı.
"Football-plus.az" xəbər verir ki, turun mərkəzi oyununda “Mançester Siti” ilə “Liverpul” üz-üzə gəldi. Qvardiolanın komandası çempion üzərində inamlı qələbə qazandı.
İnadkar “Sanderlend”in qonağı olan “Arsenal” gözlənilmədən büdrədi. İlk yarıdan sonra minimal hesabla uduzan “topçular” 2-ci hissədə iki qol vurmaqla növbəti qələbəyə doğru irəliləsə də, “qara pişiklər” uzatma dəqiqələrində məğlubiyyətdən qurtuldu – 2:2. “Tottenhem” – “Mançester Yunayted” oyunu da bu hesabla bitdi. İlk yarıda üstünlüyə malik olan “qırmızı şeytanlar” Mbemonun sayəsində hesabı açdı. Fasilədən sonra təzyiqi artıran “mahmızlar” final fitinə yaxın bir-birinin ardınca iki qol vurdu – Tel və Rişarlison fərqləndi. Hər kəs Şimali London klubunun əzmkar qələbə qazanacağını düşündüyü anda mankunianlar bərabərlik qolunu vurmağı bacardı.
Hesabat turunda problem yaşamayan komandalardan biri “Çelsi”di. “Zadəganlar” acınacaqlı durumda olan “Vulverhempton”un qapısından üç cavabsız top keçirdi. “Aston Villa” da yaxşı forma yığıb. Birmingemlilər “doğma divarlar” arasında möhkəm “Bornmut”a “divan tutdu” – 4:0. “Albalılar”ın intriqanı bərpa etmək şansı var idi, sadəcə, hesab 0:2 olarkən Semenyo penaltini boşa verdi. “Nottingem Forest” mövsümdə ikinci qələbəsini qazandı. “Meşəçilər” evdə “Lids”in öhdəsindən gəldi – 3:1. “Brentford” eyni hesabla “Nyukasl”dan üstün oldu. “Vest Hem” də fanatlarını sevindirdi. “Çəkicdöyənlər” doğma arenada “Bernli” üzərində çətin qələbə qazandı – 3:2. “Everton” “Fulhem”in qapısından hər hissədə bir top keçirdi. Turun yeganə qolsuz heç-heçəsi “Kristal Pelas” – “Brayton” oyununda qeydə alındı.
11-ci tur
Mançester Siti – Liverpul 3:0
Holann, 29. Niko, 45+3. Dokyu, 63. (52511)
MS: Donnarumma, Nunyeş, Diaş, Qvardiol, O’Rayli, B.Silva, Niko, Foden, Şerki (Savinyo, 53), Holann, Dokyu (Marmuş, 74).
Liverpul: Mamardaşvili, Bredli (Qomes, 83), Konate, Van Diyk, Robertson (Kerkez, 56), Qravenberx, Makallister (Cons, 74), Salah, Soboslai, Virts (Kyeza, 83), Ekitike (Qakpo, 56).
Tottenhem – Mançester Yunayted 2:2
Tel, 84. Rişarlison, 90+1 – Mbemo, 32. De Liqt, 90+6. (61210)
Tottenhem: Vikario, Porro (Udoci, 67), Romero (Danso, 88), Van de Ven, Spens, Palyinya (Bentankur, 79), Sarr, Conson, Simons (Tel, 79), Rişarlison, Kolo Muani (Odober, 46).
MY: Lammens, De Liqt, Maquayr (Yoro, 72), Şou, Mazraui (Şeşko, 58), Kazemiro (Uqarte, 72), Fernandeş, Dorqu (Dalot, 80), Dyallo, Kunya (Maunt, 72), Mbemo.
Sanderlend – Arsenal 2:2
Ballard, 36. Brobbi, 90+4 – Saka, 54. Trossar, 74. (46799)
Arsenal: Rayya, Timber, Saliba, Qabriel, Kalafyori, Eze (Moskera, 88), Subimendi, Rays, Saka, Merino, Trossar.
Çelsi – Vulverhempton 3:0
Hüsto, 51. Pedro, 65. Neto, 73. (39467)
Çelsi: Sançes, Hüsto (Ceyms, 77), Fofana, Çaloba, Kukurelya, Kaysedo, Fernandes (Santos, 83), Neto (Giyu, 77), Pedro (Gittens, 83), Qarnaço, Delap (Estevao, 64).
Vest Hem – Bernli 3:2
Uilson, 44. Souçek, 77. Uoker-Piters, 87 – Flemminq, 35. Kallen, 90+7. (62449)
Everton – Fulhem 2:0
Geye, 45+4. Kin, 81. (52491)
Aston Villa – Bornmut 4:0
Buendia, 28. Onana, 40. Barkli, 77. Malen, 83. (40792)
Brentford – Nyukasl 3:1
Şade, 56. Tyaqo, 78-p.; 90+6 – Barns, 27. (17207)
Kristal Pelas – Brayton 0:0
(24326)
Nottingem Forest – Lids 3:1
Sanqare, 15. Gibbs-Uayt, 68. Anderson, 90+1-p. – Nmeça, 13. (30708)
1. Arsenal 11 8 2 1 20-5 26
2. Mançester S. 11 7 1 3 23-8 22
3. Çelsi 11 6 2 3 21-11 20
4. Sanderlend 11 5 4 2 14-10 19
5. Tottenhem 11 5 3 3 19-10 18
6. Aston Villa 11 5 3 3 13-10 18
7. Mançester Y. 11 5 3 3 19-18 18
8. Liverpul 11 6 0 5 18-17 18
9. Bornmut 11 5 3 3 17-18 18
10. Kristal Pelas 11 4 5 2 14-9 17
11. Brayton 11 4 4 3 17-15 16
12. Brentford 11 5 1 5 17-17 16
13. Everton 11 4 3 4 12-13 15
14. Nyukasl 11 3 3 5 11-14 12
15. Fulhem 11 3 2 6 12-16 11
16. Lids 11 3 2 6 10-20 11
17. Bernli 11 3 1 7 14-22 10
18. Vest Hem 11 3 1 7 13-23 10
19. Nottingem Forest 11 2 3 6 10-20 9
20. Vulverhempton 11 0 2 9 7-25 2
Bombardirlər: Holann (MS) – 13, Semenyo (Bornmut), Tyaqo (Brentford), Mateta (Kristal Pelas), Uelbek (Brayton) – 6.
Növbəti turun oyunları noyabrın 22-24-ü aralığında keçiriləcək: Bernli – Çelsi, Bornmut – Vest Hem, Brayton – Brentford, Vulverhempton – Kristal Pelas, Liverpul – Nottingem Forest, Fulhem – Sanderlend, Nyukasl – Mançester Siti, Lids – Aston Villa, Arsenal – Tottenhem, Mançester Yunayted – Everton.
Turun rəqəmi
1000 – Qvardiola məşqçi karyerasında oyun sayını bu həddə çatdırdı. İspaniyalı mütəxəssis bu oyunların 716-da qələbə qazanıb, 156-da heç-heçə edib, 128-də uduzub. O, karyerası boyunca 40 böyük titul qazanıb – hər titulun qazanılmasına orta hesabla 25 oyun sərf olunub. Qvardiolanın MS-yə qədər “Barselona B”, “Barselona” və “Bavariya” komandalarını çalışdırdığını da xatırladaq.
Turun ulduzu
Jeremi Dokyu (MS) – turun mərkəzi oyununun taleyinin müəyyənləşməsində önəmli rol oynadı. Belçikalı cinahında “at oynatdı”, daim təzyiq göstərdi. Çoxlu təhlükəli vəziyyət yaratdı və haqq etdiyi qolu vurdu.
Turun sitatı
Hari Lineker, İngiltərə yığmasının sabiq hücumçusu:
“Arsenal” bu mövsüm kiməsə çatmağın qayğısı ilə yaşamır. Heç bir başqa komanda qeyri-adi dərəcədə sabit oynamasa, “topçular” üçün hər şey yaxşı olacaq. Əlbəttə, MS sürət yığır, “Liverpul” isə çox pis oynayır. “Arsenal” azarkeşi olsaydım, indi özümü yaxşı hiss edərdim”.
Faktlar
* MS “Liverpul”la çempionat oyunlarında yerinə yetirdiyi son 5 penaltidən dördünü boşa verib. Xatırladaq ki, Holann 13-cü dəqiqədə Mamardaşvili ilə mübarizədən məğlub ayrıldı. Yeri gəlmişkən, norveçli ulduz karyerası boyunca 10-cu dəfə penaltidən yararlanmadı. Onun 44 zərbəsu uğurlu olub. Mamardaşvili “böyük beşlik” ölkələrində çıxış edən qapıçılar arasında son üç mövsümdə dəf olunan penalti sayına görə liderdi. Gürcü kiper 2023/24 mövsümünün startından bəri “Liverpul” və “Valensiya”nın oyunçusu kimi 6 penalti qaytarıb.
* “Liverpul”un premyer-liqadakı uzunmüddətli qol seriyası qırıldı. “Qırmızılar” MS ilə oyuna qədər ardıcıl 44 qarşılaşmada fərqlənmişdi. Bu, premyer-liqa tarixində 2-ci nəticədi. Bu göstəricidə rekord “Arsenal”a məxsusdu. “Topçular” 2001-02-ci illərdə ardıcıl 55 oyunda fərqlənib.
Oyundan sonra
Pep Qvardiola, MS-nin baş məşqçisi:
“İlk yarını çox yaxşı keçirdik, rəqib 2-ci hissədə “artırdı”. Xüsusən də fasilədən sonra ilk 5-10 dəqiqədə oyunumuzu itirdik. Bu zaman “Liverpul”un bəzi imkanları oldu. 1000-ci oyunda belə hədiyyəyə görə oyunçulara və məşqçilərə təşəkkür edirəm. Bu həddə Mançesterdə, doğma “Siti” ilə çatdığıma görə qürur duyuram. 1000-ci oyunu ailəm önündə və məhz “Liverpul”a qarşı keçirmək mənim üçün xüsusi olaydı. Bu kluba hörmətim böyükdü”.
Arne Slot, “Liverpul”un baş məşqçisi: “Həftə çox yaxşı başladı, ancaq qorxunc şəkildə bitdi. “Mançester Siti” ilə səfər oyunu biz qarışıq istənilən komanda üçün çətin sınaqdı. Ötən mövsüm burda qələbə qazana bildik, ona görə ki, standart vəziyyətdən yararlandıq, hesabda irəli çıxdıq, sonra da inadla müdafiə olunduq. Bu gün isə faktiki qalib gəlmək imkanımız yox idi. Oyunumuzu yaxşılaşdırmalı olduğumuzu anlayırıq. Bu gün üçün müsbət məqam axtarırıqsa, 2-ci hissədəki oyunumuz xoşuma gəldi. 0:3 uduzan başqa komandalar, adətən, təslim olur, mən isə bunu görmədim. Oyuna dönməyə çalışan “Liverpul” gördüm”.
Digər xəbərlər
