Çərşənbə axşamı premyer-liqada 22-ci turun ilk beş oyunu keçirildi.

"Football-plus.az" xəbər verir ki, autsayderlərdən “Nottingem Forest”in qonağı olan “Arsenal”ın qələbə üçün oynamaqdan başqa yolu yox idi. Artetanın komandası topa nəzarət baxımından böyük üstünlüyə malik olsa da, uzun müddət bunu maddiləşdirə bilmədi. Qonaqlar ilk yarıda bir neçə təhlükəli vəziyyət yaratdı. “Meşəçilər” isə istisnasız rəqibin səhvindən yararlanmaq yolunu tutmuşdu. Fasilədən sonra oyun daha şən axarda keçdi. Meydan sahibləri daha cəsarətli oynamağa başladı ki, belədə “topçular” sürətli hücumlar qurmaq üçün böyük ərazi qazandı. Sakanın təhlükəli zərbəsindən sonra Terner komandasını xilas etdi, Jezus baxımlı hücumu dirəyə zərbə ilə bitirdi. Ancaq 2-ci hissənin ortalarında məhz Jezus hesabı açdı. Aut zamanı rəqibin cərimə meydançasına daxil olan braziliyalı iti bucaq altından hiyləgər zərbə vurdu. Bu qol oyunu canlandırdı. “Topçular”ın irəli atılmağa məcbur olan rəqibin müdafiəsini yarmaq imkanları artdı. Tezliklə “meşəçilər”i əks-hücumda yaxalayan “Arsenal” fərqi artırdı. Jezusun asmasından sonra Saka topu tora göndərdi. Fərq artandan sonra londonlular tempi aşağa salmağa çalışdı. Sona yaxın meydan sahibləri qollardan birinin əvəzini çıxdı. Uzatma dəqiqələri “Arsenal” üçün əsəb gərginliyinə çevrildi. Ancaq qələbə hesabını qoryan qonaqlar lider “Liverpul”la xal fərqini azaltdı.

Qışa qədər inamlı təsir bağışlayan “Aston Villa” son vaxtlar nəticə baxımından ləngər vurur. “Nyukasl” bu komandanın premyer-liqada evdəki 17 oyunluq məğlubiyyətsiz seriyasını bitirdi. Şənbə günü “Fulhem”i ölkə kubokundan kənarlaşdıran “sağsağanlar” Birmingemə çempionatda ardıcıl 5-ci oyunda uduzmamaq ümidi ilə yollanmışdılar. İlk yarı onların üstünlüyü şəraitində keçdi və bunun məntiqi nəticəsi kimi Şer 4 dəqiqə ara ilə iki qol vurdu.
Fasilədən dərhal sonra böyük qüvvə ilə irəli atılan “Aston Villa”nı “Nyukasl” 3-cü dəfə cəzalandırdı. Daha doğrusu, Almironun zərbəsinin qarşısını almaq istəyən Moreno topu öz qapısına göndərdi. Oyunun belə axarından narazı qalan Unay Emeri 63-cü dəqiqədə üçlü dəyişikliyə əl atsa da, komandasının gücü yalnız təsəlli qolunu vurmağa çatdı. Sona 19 dəqiqə qalmış Uotkins premyer-liqadakı 50-ci qolunu vurdu.

Çərşənbə axşamı keçirilən qalan oyunların nəticələrinə gəlincə, aşkar autsayder “Luton” gözlənilmədən avrokuboklara vəsiqəyə iddialı “Brayton”u darmadağın etdi. Adebayo bu oyunda het-triklə yadda qaldı. Evdə “Şeffild Yunayted” üzərində əzmkar qələbə qazanan “Kristal Pelas” xal ehtiyatını artırdı. “Fulhem” – “Everton” oyununda isə qolsuz heç-heçə qeydə alındı.

22-ci tur
Nottingem Forest – Arsenal 1:2
Avonyi, 89 – Jezus, 65. Saka, 72.
Arsenal: Rayya, Zinçenko (Kivyor, 90+2), Qabriel, Saliba, Uayt, Edeqor (Jorjinyo, 90+2), Rays, Smit-Rou (Haverts, 72), Martinelli (Trossar, 78), Jezus (Nketia, 78), Saka.
Aston Villa – Nyukasl 1:3
Uotkins, 71 – Şer, 32; 36. Moreno, 52-öz qapısına.
Aston Villa: Martines, Moreno, Lanqle, Konsa, Keş, Makqinn, Kamara (Remzi, 63), Luis, Tilemans (Zanyolo, 63), Uotkins, Diabi (Beyli, 63).
Nyukasl: Dubravka, Bern, Botman, Şer, Trippyer, Mayli (Livramento, 75), Gimarayns, Lonqstaff, Qordon (Kraft, 90+9), İsak (Almiron, 43), Merfi.
Luton – Brayton 4:0
Adebayo, 1; 42; 56. Oqbene, 3.
Kristal Pelas – Şeffild Yunayted 3:2
Eze, 17; 27. Olise, 67 – Brereton Dias, 1. Makeyti, 20.
Fulhem – Everton 0:0
Tottenhem – Brentford 3:2
Udoci, 48. Conson, 49. Rişarlison, 56 – Mope, 15. Touni, 67.
Mançester Siti – Bernli 3:1
Alvares, 16; 22. Rodri, 46 – Əl-Daxil, 90+3.
Liverpul – Çelsi 4:1
Jota, 23. Bredli, 39. Soboslai, 65. Dias, 79 – Nkunku, 71.
“Vest Hem” – “Bornmut”, “Vulverhempton” – “Mançester Yunayted” oyunları bu gün keçiriləcək.
1. Liverpul 22 15 6 1 51-19 51
2. Mançester S. 21 14 4 3 51-24 46
3. Arsenal 22 14 4 4 44-21 46
4. Tottenhem 22 13 4 5 47-33 43
5. Aston Villa 22 13 4 5 44-30 43
6. Vest Hem 21 10 5 6 35-32 35
7. Nyukasl 22 10 2 10 44-33 32
8. Brayton 22 8 8 6 38-37 32
9. Mançester Y. 21 10 2 9 24-29 32
10. Çelsi 22 9 4 9 36-35 31
11. Vulverhempton 21 8 5 8 30-31 29
12. Fulhem 22 7 4 11 28-36 25
13. Bornmut 20 7 4 9 28-39 25
14. Kristal Pelas 22 6 6 10 25-36 24
15. Brentford 21 6 4 11 31-36 22
16. Nottingem F. 22 5 5 12 27-40 20
17. Luton 21 5 4 12 28-38 19
18. Everton (-10) 22 8 4 10 24-28 18
19. Bernli 22 3 3 16 22-45 12
20. Şeffild Y. 22 2 4 16 19-54 10
Bombardirlər: Holann (MS), Salah (Liverpul) – 14, Solanke (Bornmut), Son Hın Min (Tottenhem) - 12, Bouen (Vest Hem) – 11.
Yeri gəlmişkən...
İngiltərə kubokunda 1/8 final cütləri bəllidi: Luton – Mançester Siti, Liverpul - Uotford (D-2)/Sauthempton (D-2) cütünün qalibi, Bristol Siti (D-2)/Nottingem Forest cütünün qalibi – Mançester Yunayted, Çelsi/Aston Villa cütünün qalibi - Lids (D-2)/Plimut (D-2) cütünün qalibi, Vulverhempton – Brayton, Bornmut - Lester (D-2), Blekbern (D-2) – Nyukasl, Şeffild Uensdey (D-2)/Koventri (D-2) cütünün qalibi - Meydston (D-6). Bu mərhələnin oyunları fevralın 28-də keçiriləcək.