Premyer-liqa varsa, tamaşa da var! “Liverpul”un “Mançester Yunayted”in “külünü göyə sovurduğu” turda başqa oyunlara toxunmamaq da olar.

“Football-plus.az” xəbər verir ki, amma hesabat turunda maraqlı nəticə təkcə bu deyildi. “Arsenal” 0:2-ni 3:2-yə çevirməklə çempionluq mübarizəsindən əsla çəkinməyəcəyini bir daha göstərdi. Digər nəhənglərdən “Mançester Siti” və “Çelsi” sevindi, “Tottenhem” isə büdrədi. Belə görünür ki, ÇL-ə 4-cü vəsiqə uğrunda intriqa son tura qədər davam edəcək.

“Arsenal”ın “Bornmut”la oyunda belə çətinlik çəkəcəyini kim düşünə bilərdi?! Lider elitada qalmağa çalışan rəqiblə oyunda xal itirməyə çox yaxın idi. Qonaqlar dərhal hesabı açdı, ardından “topçular” onların qapısını “mühasirəyə aldı”. Ancaq “albalılar” keyfiyyətli müdafiə olunurdu. Üstəlik “Bornmut” 57-ci dəqiqədə daha bir qol vurdu. Yalnız bundan sonra “topçular”ın qəzəbi yerə-göyə sığmadı. 62-ci dəqiqədə Parti fərqi azaltdı, 8 dəqiqə sonra isə Uayt hesabı bərabərləşdirdi. Qələbəyə yaxın olduğunu anlayan “topçular” sonda təzyiqi bir qədər də artırdı. Nəhayət, 8-ci dəqiqədə bu komandanın azarkeşlərini sevincə qərq edən qol vuruldu. 69-cu dəqiqədə meydana çıxan Nelson oyunun qəhrəmanı oldu. “Arsenal” inanılmaz geridönüş sayəsində yenə izləyicisi ilə xal fərqini 5-də saxladı.

İş ondadı ki, MS meydana bir neçə saat əvvəl çıxmış və “Nyukasl”ı məğlub etmişdi. Çempionluğa və ÇL-ə iddialı komandalar qarşılaşsa da, meydanda əsl mübarizə izləyə bilmədik. Qvardiolanın komandası “sağsağanlar”ın optimal formada olmamasından məharətlə yararlandı. Mankunianlar rəqibin ilk yarıda “çərçivə”yə bir zərbə də vurmasına imkan vermədi. Foden artıq 15-ci dəqiqədə rəqibin 4 oyunçusunun öhdəsindən gəlib hesabı açdı. 2-ci hissədə meydanda bərabər mübarizə getdi. Çox güman, həm də MS-nin tempi aşağı salmasına görə. Heyətdəki dəyişikliklər də “Nyukasl”ın oyununu canlandırmadı. Əvəzində Bernardo Silva meydana çıxandan cəmi 2 dəqiqə sonra fərqi artırmaqla oyunun taleyini həll etdi.
Derbilərin təbiəti belədi ki, heç də həmişə turnir cədvəlinin daha yuxarı pilləsində qərarlaşan komanda qalib gəlmir. Xüsusən də söhbət İngiltərədəki ən prinsipial dueldən gedirsə. MY cari mövsümü nə qədər ideal səviyyədə keçirsə də, “Liverpul” bu komandanın daşını daş üstə qoymadı. Əslində ilk yarının axarına əsasən oyunun 7:0 hesabıyla bitəcəyini düşünmək axmaqlıq olardı. Kloppun komandası təşəbbüsü ələ keçirmişdi, daha yaxşı oynayır, qol vəziyyətləri yaradırdı, ancaq mankunianlar da çəkinmir, cavab verirdilər. İlk yarı qolsuz sona doğru yaxınlaşarkən Qakpo səhnəyə çıxaraq məhsuldar zərbə vurdu. 2-ci hissədə isə meydanda yalnız bir komanda var idi. “Liverpul” tarixi qələbə qazandı. Qakpo dubl etdi, Nunyeslə Salah da onun uğurunu təkrarladı. Misirli həm də Firminonun fərqlənməsinə şərait yaratdı.

Mersisaydlılar artıq 5-ci pilləyə yüksəlib, Ten Haqa isə belə faciəvi oyundan sonra yetirmələrini özünə gətirmək çətin olacaq.

“Vest Hem” və “Çelsi” üzərində qələbələr “Tottenhem”i ilk “4-lüy”ə qaytarmışdı, ancaq “mahmızlar” gözlənilmədən Vulverhemptonda büdrədi. Bəlkə də qonaqlar “Şeffild Yunayted”lə kubok oyununda çox güc itirmişdi. Ancaq rəqiblər bərabər şəraitdə idi: “canavarlar” da həftəiçi 7-ci turdan təxirə salınan oyuna çıxmışdılar. Ədalət naminə deyək ki, “Tottenhem” oyunun əksər bölümündə təşəbbüsə malik oldu. İlk yarıda qonaqlardan Kulusevski, Perişiç və Porro fərqlənə bilərdi. 2-ci hissənin əvvəlində Son Hın Minin də zərbəsi tirdən dönəndən sonra aydın oldu ki, bəxt “mahmızlar”dan üz döndərib. Sona yaxın artıq meydan sahibləri üstün təsir bağışlayırdı. 82-ci dəqiqədə Ximenesin qapıçıdan dönən zərbəsini qapıya göndərən Traore “canavarlar”a qələbə qazandırdı.

“Çelsi” hər nə qədər kadr problemləriylə üzləşsə də, “Lids”lə oyuna yaxşı hazırlaşmışdı. İlk yarını yüksək tempdə keçirən londonlular çoxlu qol vəziyyəti yaratdı. Onlar ən azı üç qol vurmalıydı. Fasiləyə yaxın qonaqlar da bir qədər fəallaşdı. 2-ci hissənin əvvəlində künc zərbəsindən sonra Fofana “Çelsi”ni irəli çıxardı. Potter dəyişikliklər hesabına qələbəni qorumaq xəttini tutdu və bu dəfə niyyətinə çatdı. “Zadəganlar” son 7 oyunda ilk qələbəsini qazandı. Ancaq onların 2-ci hissədəki oyunu birmənalı təsir bağışlamadı.

* MY klub tarixində premyer-liqadakı ən böyükhesablı məğlubiyyətlə üzləşdi. Bundan başqa, 0:7 mankunianlar üçün bütün tarixi ərzindəki ən pis nəticənin təkralanmasıdı. Onlar buna qədər üç dəfə 0:7 uduzmuşdular – 1926-cı ildə “Blekbern”ə, 1930-cu ildə “Aston Villa”ya, 1931-ci ildə isə “Vulverhempton”a. Ten Haq da 481 oyunu əhatə edən məşqçilik karyerasında ən böyükhesablı məğlubiyyətini yaşadı.
* MY-nin məğlubiyyətsiz oyunlar seriyası 11-də qırıldı. Komanda buna qədər keçirdiyi son 11 oyunun 9-da qələbə qazanmış, 2-də heç-heçə etmişdi.
* Salah Faulerin “Liverpul”un heyətində premyer-liqada qol sayına görə rekordunu qırdı. Misirli hücumçu hesabat turunda qol sayını 129-a çatdırdı. O həm də premyer-liqada MY-nin qapısına hamıdan çox – 10 dəfə yol tapan Şirerin rekordunu təkrarladı.
* “Arsenal” 2012-ci ildən bəri ilk dəfə premyer-liqa oyununda 2 top fərqi ilə geri düşdüyü oyunda qalib gələ bildi. “Topçular” bunu sonuncu dəfə həmin ilin fevralında – “Tottenhem”lə oyunda (5:2) bacarmışdılar. Sonra isə 65 dəfə 0:2-ni qələbə çevirə bilməmişdilər.
* Billinq “Bornmut” üçün özünəməxsus rekord müəyyənləşdirdi. 26 yaşlı danimarkalı hakimin start fitindən 9,11 saniyə sonra “Arsenal”ın qapısına yol tapdı. Bu isə premyer-liqa tarixində ən erkən 2-ci qoldu. Billinq yalnız 2018/19 mövsümündə 7,69-cu saniyədə fərqlənən “Sauthempton”un forvardı Şeyn Lonqdan geri qalır.