"Zirə" Konfrans Liqasının 2-ci təsnifat mərhələsində “Hayduk”la qarşılaşacaq.

“Football-plus.az” xəbər verir ki, ilk görüş sabah keçiriləcək. “Qartallar”ın kapitanı Qismət Alıyev oyunöncəsi mətbuat konfransında iştirak edib:

Daha sonra komandanın baş məşqçisi Rəşad Sadıqov jurnalistlərin suallarını cavablayıb.

- Yeni mövsüm başlayır. Çempionatı uğurla başa vurduq. Avrokuboklarda ölkəmizi uğurla təmsil etmək niyyətindəyik. Rəqib “Hayduk”du. Oyuna yaxşı hazırlaşmışıq. Rəqib ideal vəziyyətdə olmasa da, buna yaxındı. Düşünürəm ki, sabah maraqlı və gərgin oyun olacaq. Əlimizdən gələni edəcəyik ki, cavab oyununa yaxşı nəticə ilə gedək. Bütün klubların azarkeşlərinə səslənirəm: işləri yoxdusa, gəlsinlər, bizə dəstək olsunlar.

— Belə rəqibə qarşı necə oynamaq lazımdı?
— Mən öz komandamı düşünürəm. Biz hazırlıqları necə icra edəcəyik ki, uğurlu olsun – əsas məsələ budu. Kimin uğurlu, kimin uğursuz olacağını zaman göstərəcək.

— Suma və Utziqdən nə xəbər?
— Suma bu gün səfərə yola çıxacaq. 10 gün idi ki, razılaşma əldə etmişdik. Ona uğurlar arzulayırıq. Utziq barədə isə ötən mövsümün sonunda demişdim. Artıq elə məsələdi ki, ya mənə aiddi, ya idarə heyətinə. Bakıya iyunun 14-də gəlməli idi, amma bir ay gec gəldi. Pul cəriməsi edildi. 4 həftə əvəzedici komandada olacaq.

— Utziqin bağışlanmaq ehtimalı var?
— Onu komanda daxilində görmürəm. Başqa futbolçulara da təklif var idi. Amma onlar belə etmədi. O, hələlik cərimələnib və 4 həftə əvəzedici komandada oynayacaq.

— Sumasız da “Zirə” yaxşı oynayırdı. Onun yerinə Till gəlib..
— Hansısa futbolçu üzərində oyun fəlsəfəsi qurmaq fikrimiz olmayıb. Suma avrokubok oyunlarımızda əsas heyət futbolçusu deyildi. Till isə iki gün əvvəl zədələndi.

— Yoxlama oyunlarından sonra komandanız necə təəssürat bağışladı?
— Yeni transferlərdən razıyam. Komanda daxilində hansısa anlaşmazlıq olduğunu deyə bilmərəm. İlk məşqlərdən bu oyuna hazırlaşırdıq. İnşallah, qələbə qazanarıq.

— Transfer prosesi istədiyiniz kimi oldumu?
— Heç vaxt adlara baxmamışam. Mətbuatda transferlərimiz haqda tənqidlər olurdu, amma həmişə bizdə belə olub. Güclü futbolçu transfer etməmişik, amma seleksiyamız uğurlu olub. Rəhbərliyi yaxşı tanıyıram, verilən sözlər hər zaman tutulub. Rəhbərliyi dəstəkləyirəm.

— Rəqib kimi gəldiyiniz stadion sizin üçün doğma olmalıdı. Bu barədə nə düşünürsüz?
— “Neftçi Arena” həmişə mənim üçün doğmadı. Özüm çox istədim ki, burda oynayaq. "Neftçi" rəhbərliyinə təşəkkür edirəm.Əlavə etmək istəyirəm. Yurçeviç bir-iki açıqlama verib. İki mövsümdü ki, dördüncü pillədə bitirmişik. Həmişə ən azı dörd legionerimiz olub. Deyir ki, yaxşı məvacib alırlar. Elə imkanı varsa, gəlsin desin, Azərbaycan millisində nə qədər maaş alır? Mənim futbolçularım haqqı olduğundan az alır...

MÜZƏFFƏR QULUZADƏ