“Qarabağ”ı çıxsaq, digər rəqiblər ayrı-ayrılıqda favorit sayıla bilər. Bu da reytinqə görə belədi. Komandalarımızın reytinqi aşağı olduğuna görə güclü rəqiblərlə qarşılaşırlar. “Qarabağ”ın reytinqinin yüksək olması mütləq növbəti mərhələyə adlayacağı demək deyil. İllərdi avrokubokda oynayırlar. Komandanın təcrübəsi favoritin “Qarabağ” olmasına gətirib çıxarır. “Qarabağ”ın mərhələ adlaması, yəqin ki, heç kim üçün surpriz olmayacaq. İrlandiyada futbol inkişaf etməyə başlayıb. Milli komandaları güclüdü, o heç. Klublarında isə hansısa futbolçu özünü yaxşı tərəfdən göstərən kimi ya Şotlandiya klublarına transfer olunur, ya da İngiltərənin 2-3-cü liqalarına. Bir balaca keyfiyyətin varsa, İngiltərədə oynayırsan. Orda maliyyə daha yüksəkdi. İnanmıram ki, İrlandiya və ya Şimali İrlandiya klubları bizə təzyiq göstərsin. Digər tərəfdən, onu da nəzərə alaq ki, ilkin mərhələlər “Qarabağ” üçün ağır olur. İstirahətdən gəlirlər, hazırlıq dönəmi qısa olur. Milli komandada da oynayırlar deyə, yorğunluq özünü göstərir. Bu məqamlar “Qarabağı”ın işini çətinləşdirə bilər. “Sabah”ın rəqibi “Selye” son dönəmlərdə avrokuboklarda uğur qazanan klubdu. Ötən mövsüm çempionluq, bu mövsüm kubok qazanıblar. Sabiq Yuqoslaviya ölkələrinin keyfiyyətli futbolçuları həmişə olub. Bu sözləri “Hayduk”a da aid edə bilərik. Yaxın ölkələrin təmsilçiləridi. Xorvatiya çempionatında “Dinamo” dominantlıq etsə də, “Hayduk”da da çox keyfiyyətli futbolçular var. “Hayduk” ustalıq səviyyəsi yüksək olan, aqressiv futbolçulardan formalaşmış, belə turnirlərdə təcrübəsi olan komandadı. “Zirə” üçün çox çətin olacaq. “Hayduk”, “Dinamo” kimi komandalar 15-20 milyon avroya futbolçu satır. Bir az parıldayan futbolçular top-klubların diqqətini çəkir. “Selye” haqda danışsaq, baş məşqçisini də qeyd etmək lazımdı. İspaniyalı Riera 2023-də komandaya gəlib. Daha sonra “Bordo”ya getdi. Ordan yenidən “Selye”yə qayıtdı. Topa sahib olmaq bu komandanın oyun fəlsəfəsi kimi görünəcək. Hər iki oyunda dominantlıq etməyə çalışacaqlar. “Sabah”ın üstünlüyü də cinahlarıdı. Belə vingerləri olan komanda rəqib qapısı qarşısında qol imkanları yarada biləcək. Yaxşı legionerləri də var. “Araz-Naxçıvan”a gəlincə, düşünürəm ki, “Aris” favoritdi. “Araz-Naxçıvan” heyətini qoruyub. Mövsüm ərzində komandada ehtiyat qüvvənin nə qədər kasad olduğunu gördük. Bir futbolçu cəzalı, yaxud zədəli duruma düşəndə onu əvəzləyəcək şəxs tapılmır. Bu amil də Naxçıvan təmsilçisini rəqibindən geri salır”.