Oqtay Abdullayev “Neftçi”nin yox, “Turan Tovuz”un azarkeşidi
Veteran futbolçu Oqtay Abdullayev 70 yaşını tamamlayıb.
1977-79-cu illərdə Naxçıvan “Araz”ında çıxış edən yarımmüdafiəçi 71 rəsmi oyuna çıxıb, 10 qol vurub. Onun sonrakı karyerası “Neftçi” ilə bağlıdı. 2001-ci ildə “ağ-qaralar”ın baş məşqçisi olan Oqtay Abdullayev mövsümü 2-ci yerdə başa vurmaqla yanaşı, ölkə kubokunun finalına da yüksəlib. Oqtay bəy son vaxtlar həm Futbol Veteranları İttifaqının prezidenti, həm də “Turan Tovuz”un İdarə Heyətinin üzvü kimi fəaliyyət göstərir.
Yubilyar "Football-plus.az"a açıqlama verdi:
“Futbola gəlişim, ömrümü futbola həsr etməyim ilə qürur duyuram. Həyatımın ən unudulmaz anları məhz futbolla bağlıdı. Baxmayaraq ki, “Araz”da da, “Neftçi”də də oynamışam, baş məşqçi kimi də fəaliyyət göstərmişəm, amma məni daha çox “Neftçi”nin bazasının direktoru kimi tanıyırlar. 35 il az müddət deyil. 35 ildi burdayam”.
Abdullayev ölkə futbolu ilə bağlı arzularını da dilə gətirdi:
“Azərbaycan futbolu inkişaf etməli, yüksək yerlərdə olmalıdı. Çünki Azərbaycan futbolu buna laiqdi. Bizim xoşbəxtliyimiz ondadı ki, cənab Prezidentimiz idmanı sevir, qayğı göstərir. Xüsusən də futbolu. Həm yaxşı futbol oynayır, həm də futbola böyük marağı var”.
Oqtay bəydən hansı klubun azarkeşi olduğunu da soruşduq - illərini verdiyi “Neftçi”nin, yoxsa indi daha yaxşı nəticə göstərən “Qarabağ”ın? Səbəbkar bir başqa komandanın adını çəkdi:
“Turan Tovuz” azarkeşiyəm”.
Bu cavabın səbəbi də yuxarıdakı təqdimatda gizlənir.
MÜZƏFFƏR ULUZADƏ
Digər xəbərlər
