“İlk oyundakı 1:0 hesablı qələbəyə baxmayaraq, cavab görüşü daha çətin olacaq. "Zirə"nin məşqçi heyəti Tiraspolda doğru strategiya seçmişdi, ehtiyatlı oynayır, ələ düşən imkanlardan 100 faiz yararlanmağa çalışırdılar. Amma məşqçinin niyyəti bir yana, bəzi oyunçular o fikri həyata keçirməkdə çətinlik çəkirdi. Yəni rəqibə qarşı qoyulan strategiya vardı ki, təkbətəkdə oyunçuların bəziləri çox zəif qalırdılar. O da başadüşüləndi ki, hazırlıq dövründən sonra ilk oyun həmişə belə çətin keçir. Azarkeşlər "Zirə"nin qələbəsini arzulaya bilər, amma "Şerif" çox yaxşı komandadı. 7 oyunçu rəqibin heyətində ilk dəfə meydana çıxırdı. İkinci hissədə "Zirə"ni öz qapısına sıxmağı bacarmışdılar, hətta qol vurmaq imkanları da var idi. Ona görə də mənim üçün ilk oyun hələ heç bir şey demək deyil. Onu da nəzərə alaq ki, səfər qolu qaydası qüvvədən düşüb. "Şerif" elə klubdu ki, istənilən halda bir qol vurmağı bacarır. Hücumçuları təkbətək mübarizələrdə çox yaxşıdı. Bu üzdən düşünürəm ki, heç nə həll olunmayıb. Cüzi üstünlük bizdə olsa da, komandaların mərhələ keçmək şansı bərabərdi. Oyunun axarına gəlincə, "Zirə" ev sahibi kimi daha çox hücum edəcək, amma "Şerif" bir top fərqini ilk yarıdaca aradan qaldırmağa çalışacaq. Daha böyük qüvvə ilə də hücuma atılacaqlar”.