Srağagün keçirilən “Qarabağ” – “Sabah” oyununa damğa vuran şəxslərdən biri də Tellur Mütəllimov oldu.

Onun 74-cü dəqiqədə vurduğu qol şübhəli ofsayd üzündən sayılmasa da, uzatma dəqiqələrində topu elə nöqtəyə göndərdi ki, bundesliqa təcrübəsinə malik Andrey Lunyovun heç ruhu da incimədi. Oyundan sonra Tellurla söhətləşdik.

- “Qarabağ”a 7:1 hesablı məğlubiyyətdən sonra qarşılaşdığınız son iki matçda 1 qələbə, 1 heç-heçə etməklə yaxşı nəticə göstərmisiz. Bu nəticələri acı məğlubiyyətin qisası adlandıraq, yoxsa Murad Musayevin gedişi ilə əsaslandıraq?
- Öncəliklə onu deyim ki, Murad Musayevin gedişi hər birimizi təəssüfləndirdi. Lakin bu futboldu, burda ayrılıqlar da qaçılmazdı. O ki qaldı oyuna, ölkə çempionu ilə oyunlarımız həmişə maraqlı keçir. Son iki oyun da bura daxildi.

- 74-cü dəqiqədə vurduğun qol ofsayd üzündən qeydə alınmadı. PFL-nın yayınına baxdıqda ofsaydın olub-olmaması ilə bağlı qəti fikir yürütmək çətindi. Həmin epizoda sonradan baxdınmı? Səncə, ofsayd var idi?
- Doğrusu, bu haqda danışmaqda çətinlik çəkirəm. Videoda ofsayd olduğunu seçmək çox çətindi. Ancaq belə qərar verildi. İndi nəyisə dəyişmək mümkün deyil. Şadam ki, bu oyunda qol vurdum və komandamın xal qazanmasına töhfə verdim.

- “Qarabağ”ın “Braqa” ilə oyunları barədə nə deyə bilərsən? Səncə, turu keçə biləcəklər?
- Bunu hər birimiz arzulayırıq. İnşallah, “Qarabağ” “Braqa” ilə oyundan yaxşı nəticə ilə ayrılaraq hər kəsi sevindirər. Əlbəttə, turu keçə bilərlər. Məncə, komandada bu güc var. “Qarabağ”a bu oyunlarda uğurlar arzulayıram.

- Komanda son oyunlarda yavaş-yavaş özünə gəldiyini göstərir. Belə motivasiyanızın səbəbi nədi?
- Əslində “Qarabağ”a böyükhesablı məğlubiyyəti çıxmaq şərti ilə digər oyunlarımızdan da yaxşı nəticə ilə ayrılmışdıq. Fikrimcə, komandada özünəinam var. İnşallah, qarşıdakı oyunlarımızdan da yaxşı nəticələrlə ayrılarıq.

- Ruslan Qafitullin Musayevin daha tələbkar olduğunu, oyunçuların isə indi daha rahat oynaya bildiklərini söylədi. Bu fikirlərlə razısanmı?
- Düzü, mənim işim məndən tələb olunanı meydanda yerinə yetirməkdən ibarətdi. Həmişə də bunu ən yaxşı şəkildə həyata keçirməyə çalışmışam. Bu necə alınır – artıq buna məşqçilər heyəti daha düzgün qərar verə bilər.

- Murad Musayevin gedişindən sonra oyun üslubunuzda müəyyən dəyişikliklər görünür. Demək olarmı ki, bu mövsüm üçün hədəfləriniz də dəyişib?
- Hədəflərimizdə heç bir dəyişiklik yoxdu. Həmişə olduğu kimi, oyundan-oyuna artırmağa və hər matçdan maksimum nəticə ilə ayrılmağa çalışırıq.

- Gələcək karyeranla bağlı nə düşünürsən? Qış fasiləsində sənə təkliflər oldumu? Legioner həyatı yaşamaq istəyərsən?
- Hazırda yalnız “Sabah”, komandamın qarşıdakı matçlardan yaxşı nəticələr qazanması barədə düşünürəm. Qarşıda nə olacağını zaman göstərəcək.

- Bildiyin kimi, Millətlər Liqasının püşkü atıldı və yığmamızın rəqibləri bəlli oldu. Səncə, bu qrupdan çıxa bilərik?
- Hazırda Avropada asan rəqib yoxdu. Bu rəqiblərlə daha öncə qarşılaşmışıq. Hər bir rəqiblə oyun çətin olacaq. İnanıram ki, millimiz bu oyunlardan müsbət nəticə ilə ayrılaraq azarkeşlərini sevindirəcək.

- Millidən təklif gəlsə, oynamaq istəyərsən?
- Əlbəttə, millidə çıxış etmək hər bir futbolçu üçün fəxrdi. Mənim üçün də həmçinin.

- Ölkədə legioner limitinin dəyişdirilməsi ideyası futbol ictimaiyyətini ikiyə ayırıb. Sən bu haqda nə düşünürsən? Limitin dəyişdirilməsi yerli oyunçuların inkişafına mane olacaq?
- Fikrimcə, bu suala futbol mütəxəssisləri cavab versə, daha doğru olar. Mənim işim futbol oynamaqdı. İstənilən halda həmişə olduğu kimi, yenə əsas heyətdə yerimi almaq üçün var qüvvəmlə çalışacam.

KAMAL SƏFƏR