Misli premyer-liqasının 32-ci turunun “Sabah” – “Şamaxı” oyunu qalmaqalla zəngin oldu. Daha dəqiq desək, Fərid Hacıyevin idarəçiliyi heç də birmənalı qarşılanmadı. Referi əsəblərinə hakim ola bilməyən Murad Musayevi də meydandan qovdu.

“Football-plus.az” saytı olaraq Fərid Hacıyevin bu görüşdə mübahisə doğuran səhvlərinin siyahısını hazırladıq.

5-ci dəqiqədə Kaşuk cərimə meydançasına sürətlə daxil olarkən Rəhmanın müdaxiləsi ilə üzləşsə də, referi davam işarəsi verdi. 32-ci dəqiqədə "Sabah" Volkovla 2-ci qolu vurdu. Amma Hacıyev ofsayd qeydə aldı. İrəliləyən dəqiqələrdə "bayquşlar"ın kapitanı Elbin Camalov Bahadur Həziyevə qarşı kobudluq etsə də, Hacıyev əlini cibinə atmadı. Hakim 86-cı dəqiqədə isə Cəlal Hüseynovun hava mübarizəsində Apehə qarşı kobud oynamasına laqeyd yanaşdı. Bu epizod onsuz da oyunboyu çılğınlığı, aqressiyası və hakimlikdən narazılığı ilə seçilən Murad Musayevin səbrini daşırdı və rusiyalı mütəxəssis daha emosional şəkildə etirazını bildirdi. Hətta Apehə qarşı kobudluğu əyani şəkildə göstərmək üçün köməkçisinin belinə çıxdı. Referi buna görə ona sarı vərəqə göstərdi. Həmin an matçın 87-ci dəqiqəsi gedirdi. Rəsmi xəbərdarlığa baxmayaraq, Musayevin narazılığı bitmədi və 90+1-ci dəqiqədə ikinci “sarı” ilə meydandan qovuldu. Qeyd olunan mübahisəli epizodlara VAR bir dəfə də müdaxilə etmədi.

İkinci yarıda əvəzetmələr, "bayquşlar"ın futbolçularının vaxtı uzatması, referi ilə Murad Musayev arasında qarşıdurmaya rəğmən, cəmi 3 dəqiqə əlavə olundu. Mətbuat konfrasında "Şamaxı"nın baş məşqçisi Vüqar Əsgərli də bundan narazılığını dilə gətirdi. Murad Musayev isə hakimlər briqadasını səriştəsizlikdə, rəqibə həddən artıq "tolerant" yanaşmada qınadı.

ABDULLA İSMAYILOĞLU