"Bir çox klublardan fərqli "Turan Tovuz" bütün sıxıntılara rəğmən çempionatda qalıb oynadı. Bir çox güclü klub var idi ki, Avroliqaya yüksəlib, ölkə çempionatında müxtəlif mükafatlara sahib oldular. Lakin maliyyə sıxıntısı yaşayan kimi hər biri sıradan çıxdı. “Turan Tovuz” acınacaqlı durumda, yalnız AFFA-nın maliyyə dəstəyi ilə premyer-liqaya gələ bildi. Cuzi xərclərlə də nəyəsə nail olmaq mümkün deyil. Akademiyamızda çox istedadlı uşaqlar var. İnanıram ki, onları gələcəkdə Tovuz futbolunun yetirməsi kimi ölkə xaricində də görmək nəsib olacaq. Komanda premyer-liqaya gələndən təxminən yarım il sonra klubu sponsor götürdü. Əvvəlkiləri də hesablasaq, “Huner Group” klubun dördüncü sponsorudu. Öncəki şəxslərin də klub üçün çox böyük, təmənnasız xidmətləri olub. Onların zəhmətini kiçiltmək olmaz. Ehtiram müəllim də həmin şəxslərdən biridi. Onun komandaya gəlişi hər şeyi dəyişdi. Klubda böyük inam və özgüvən yaratdı. Komandanın avtobusu yox idi. Gələndən dərhal sonra klub avtobusla təmin olundu. İşıqlandırma sistemi, elektron tablo, Futbol Akademiyasının, akademiya binasının tikilməsi - hamısı onun adı ilə bağlıdı. Gələcəkdə ot örtüyü nəzərdə tutulub ki, suni meydançadan təbii meydançaya keçid edək. Fevralın 11-i klubu himayəyə götürdü. Mövsümün əvvəlində isə idarə heyətinin sədri seçildi. Böyük həvəslə bu işə yanaşırıq. Hər kəs öz sahəsində əlindən nə gəlirsə, kömək etməyə çalışırıq ki, klub daha çox inkişaf etsin. İstər kollektiv, istərsə də futbolçularımız arasında çox böyük nizam-intizam, mehribanlıq var. Ehtiram müəllimə çox güvənirik. Onun dediyi kimi, gələcəyin komandası qurulur. Belə hesab edirik ki, 2-3 il ərzində komanda çempionatda sözünü deyəcək və futbolumuza tövhə verəcək. Necə ki, bir çox ilklər, rekordlar "Turan Tovuz"la bağlıdı. Bəzi sponsorlar olur ki, işini, sadəcə, maliyyə vəsaiti ayırmaqla bitirir. Amma Ehtiram Quliyev fərqlidi. O, futbola olduqca bağlı biridi. Dünya praktikasında olan irəliləyişləri klubumuzda tətbiq etmək istəyir. Sadə biri olduğu üçün böyük məhəbbət qazanıb. Bir sözlə, "Turan Tovuz" un Ehtiram Quliyevlə tarix yazacağına çox inanıram".

"İki cür rəhbər olur. Biri gündəlik işə görə özünü məsuliyyətli hiss edir, digəri isə klubun gələcək uğurları haqda düşünür. Ehtiram müəllim "Turan Tovuz" un gələcək uğurları haqda düşünür. Çox dürüst insandı. Az müddətdə müxtəlif dəyişikliklər etdi. Avtobus, tablo və işıq sistemi quraşdırıldı. Düzdü, işıq sistemi güclü külək nəticəsində qırıldı. Amma bunda nə "Huner Group"un, nə də Ehtiram Quliyevin bir günahı var. Digər klublar məndən inciməsin, amma ölkəmizdə dürüst rəhbərliyi olan bircə "Qarabağ"ı görürdüm. Göründüyü kimi, qısa müddət ərzində böyük uğurlar əldə etdi. Ehtiram Quliyevin "Turan Tovuz"a rəhbər seçilməsi digər klublara da nümunə olar. Həmin klublar da bu yolla getsə, gələcəkdə böyük nailiyyətlər əldə edərlər. Düşünürəm ki, gələcəkdə Ehtiram müəllimin maliyyə vəziyyəti yaxşı olarsa, "Turan Tovuz" əvvəlki şöhrətini geri qaytara biləcək".

"Huner Group" klubu himayəsinə götürəndən sonra burda çox şey dəyişdi. Sağ olsun Ehtiram Quliyev, stadionda projektor yox idi, onu düzəltdirdi. Tablo və avtobus ilə bizi təmin etdi. Akademiya tikmək üçün əlavə torpaq sahəsi alıb. Gələcək üçün planları var. İnşallah, hər şey öz axarı ilə getsə, çox gözəl olacaq. Biz də Ehtiram müəllimi dəstəkləyir, ona can sağlığı arzulayırıq. Belə bir rəhbər bizə nəsib olduğu üçün çox şanslıyıq. Onun sayəsində "Turan Tovuz"u yaxın müddətdə Avropada görəcəyik".