''Fənərbaxça'' dünən sürpriz şəkildə İsmayıl Kartalın baş məşqçi postuna gətirildiyini açıqladı.

"Football-plus.az" xəbər verir ki, bu mütəxəssislə birillik müqavilə imzalandı. Halbuki Əziz Yıldırım prezident seçildikdən sonra klubun başına Aykut Kocamanın gələcəyi iddia olunurdu. Yıldırım özü də bildirmişdi ki, onun əsas namizədi Kocamandı.

Türkiyə mətbuatının yazdığına inansaq, tərəflərin anlaşa bilməməsimin əsas səbəbi Kocamanın öz köməkçiləri ilə işləmək istəməsidi. Onların adları açıqlanmasa da, bildirilir ki, rəhbərlik Kocamanın köməkçilərinin çalışmasına razı olmayıb. Rəhbərliyin təklif etdiyi köməkçiləri də Kocaman bəyənməyib.

Təsadüfi deyil ki, İsmayıl Kartal vəzifəyə gələn kimi ''Fənər'' Dirk Kuytla anlaşıb. Görünür, Kocamandan fərqli olaraq Kartal Kuytun onun köməkçisi olmasına etiraz etməyib. Daha bir şayiəyə görə isə Kocaman variantının alınmamasının ardından Əziz Yıldırım Jorje Jezuşla əlaqə qurub. Amma ''Əl-Nəssr''dən ayrılan və hazırda boşda olan ünlü portuqaliyalı mütəxəssis dünya çempionatının bitməsini gözləmək qərarına gəlib. O, ''Fənər'' rəhbərliyinə qərarını mundialdan sonra verəcəyini deyib. Bu isə Əziz Yıldırımı qane etməyib. Yıldırım ''itiriləsi 1 günümüz də yoxdu'' deyərək İsmayıl Kartal ilə anlaşıb.

Bu arada çoxdan yekunlaşan transfer nəhayət, rəsmiləşmək üzrədi. Vedat Muriqi dünən İstanbula gəldi. Fanatlar onu hava limanında təmtəraqlı şəkildə qarşılayıblar. Təcrübəli kosovolu forvard tibbi müayinədən keçdikdən sonra onunla ''3+1'' illik müqavilə imzalanacaq.

Xatırladaq ki, Muriqi daha öncə 2019/20-də ''Fənər''də çıxış edərək 36 rəsmi oyunda aktivinə 17 qol, 7 məhsuldar ötürmə yazıb.