Bu komandalar son 10 gündə üçüncü dəfə üz-üzə gəldi.

Xatırladaq ki, Murad Musayevin baş məşqçi postundan istefasına səbəb olan 1:7-nin ardından “Sabah” toparlanmış və kubokun cavab görüşündə “Qarabağ”ı 4:3 hesabıyla məğlub etmişdi. İndi “tələbələr”in həmin qələbənin təsadüf olmadığını göstərmək imkanı var idi. “Qarabağ” isə Portuqaliya səfəri ərəfəsində bir daha gücünü yoxlamaq, həm də təbii ki, qələbə qazanmaq istəyirdi.

Oyuna nominal meydan sahibləri fəal başladı. Topa əsasən onlar nəzarət edirdi. İlk təhlükəli vəziyyəti də Qurbanovun komandası yaratdı. 5-ci dəqiqədə Andradenin ötürməsindən sonra Juninyo toru kənardan silkələdi. 8-ci dəqiqədə Ponomaryovun planlarına qətiyyən uyğun olmayan hadisə baş verdi. Til zədələnərək, meydanı xərəkdə tərk etdi. Çempionatın lideri 28-ci dəqiqədə növbəti təhlükəli vəziyyəti yaratdı. Rəqib müdafiəsinin azlıqda olmasından istifadə edən Andrade əks-hücum zamanı topu qapı qarşısına ötürsə də, Hadudi topun Juninyoya çatmasına icazə vermədi. Cəmi bir dəqiqə sonra Zubir gözəl ara ötürməsiylə Juninyonu qapıçıyla üzbəüz qoydu. Fəqət İmanov topun tora qovuşmasına mane olaraq kornerə göndərdi. Küncdən zərbənin davamında top “Sabah”ın kapitanı Seydiyevin əlinə dəydi. Baş hakim Həmzəzadə anındaca penalty nöqtəsini göstərdi. Topa yaxınlaşan Yankoviç komandasını hesabda önə çıxara bildi – 1:0. Ağdamlıların aşkar dominantlığı fonunda “Sabah” 42-ci dəqiqədə əks-hücuma çıxa bildi. Ancaq Bəhlul Sekidikanın ötürməsinin Marqaritaya çatmasına imkan vermədi. Bundan ruhlanan Masazır təmsilçisi hücumun kəsərini artırdı. Qonaqlar ilk hissənin son dəqiqəsində penalti qazandı. Letiçin ötürməsini qəbul edən Parris ayağına zərbədən sonra yerdə qaldı. VAR-la uzun-uzadı danışıqdan sonra epizoda özü baxan baş hakim penalti qərarı verdi. Belfodil Lunyovla mübarizədən qalib ayrıldı – 1:1.

Sən demə, oyunun daha maraqlı bölümü irəlidəymiş. 2-ci hissə başlayandan cəmi 6 dəqiqə sonra referi növbəti dəfə əllə oyuna görə matçı dayandırdı. Həmzəzadə VAR-la danışıqdan sonra epizoda baxmağa yollandı. Və Bədavi açıq əllə topun qarşısını aldığına görə növbəti dəfə “nöqtə”ni göstərdi. Belfodil bu dəfə də hədəfdən yayınmadı – 1:2. 10 dəqiqə sonra referi bu oyunda 4-cü dəfə penalty qərarı verdi. Bu dəfə Silvanın qapı qarşısına ötürməsi zamanı Boyan əllə oynamışdı. Topun arxasına keçən çempionatın bombardiri Juninyo cari mövsümdəki qollarının sayını 15-ə çatdırdı. Oyunda 2-ci dəfə hesaba tarazlıq gəldi. 69-cu dəqiqədə “bayquşlar”ın daha bir oyunçusu Marqarita zədələnərək mübarizəni davam etdirə bilmədi.

Meydanda yenə “Qarabağ” üstün idi. 74-cü dəqiqədə İsayevin Krossayağı ötürməsindən sonra qapıçıyla təkbətək qalan Veşoviçin zərbəsini İmanov dəf etməyi bacarsa da, top düz Zubirin önünə düşdü. Lakin o, topu boş qapıdan keçirə bilmədi. Üstündən dəqiqə keçməmiş Tellur “Sabah”ı hesabda önə keçirsə də, baş hakim ofsayd qərarı verərək qolu ləğv etdi. Gərginlik ən üst səviyyədə idi. 86-cı dəqiqədə Bədavinin çaşdırıcı zərbəsini İmanov gözəl seyvlə dəf etdi. Cəmi 2 dəqiqə sonra yenidən səhnəyə İmanov çıxdı. Bu dəfə Toralın standart vəziyyətdən qapıya göndərdiyi topun qarşısını aldı. İmanov artıq komandasının qəhrəmanı idi. 5-ci uzatma dəqiqəsində Tellur uzaq məsafədən möhtəşəm zərbə ilə Lunyovu təslim olmağa məcbur etdi. Artıq hər kəs oyunun taleyinin həll olunduğunu düşünürdü ki, səhnəyə yenidən Yusif İmanov çıxdı. Özü də bu dəfə mənfi qəhrəman kimi. Qapıçı Benzyanın elə də qüvvətli olmayan zərbəni ayaqlarının arasından buraxdı. Beləliklə, “Sabah” ona hava-su kimi vacib olan qələbəni məhz qapıçısının kobud səhvi üzündən əldən verdi. “Qarabağ” isə çətin səfər oyunu ərəfəsində qətiyyən ümid vermədi. Ümid edirik ki, bu səhvlər Portuqaliyada təkrarlanmaz.

Gözdən qaçmadı
* 16-cı dəqiqədə “Qarabağ” cərimə zərbəsi yerinə yetirərkən İqor Ponomaryov “canlı səd”də iki oyunçunun qalmasını istəsə də, futbolçular qapıçının göstərişi ilə üç nəfər qaldı.
* Ponomaryov 37-ci dəqiqədə Anatoli Nuriyevin sarı vərəqə almasına görə Kamal Umudluya sərt şəkildə etiraz etdi.
* Tellur Mütəllimovun uzaq məsafədən vurduğu baxımlı qolu Qurban Qurbanov da alqışladı.
* “Qarabağ”ın ardıcıl 2-ci çempionat oyununda 4 penalti təyin olundu ki, çətin dünya tarixində bunun anoloqu ola.

KAMAL SƏFƏR