“Zirə”nin mövsüm bitən kimi yollarını ayırdığı futbolçulardan biri də Ceyhun Nuriyev oldu.

“Football-plus.az” xatırladır ki, klub onunla müddəti başa çatan müqaviləni yeniləmədi. Maraqlıdı ki, təcrübəli yarımmüdafiəçi millinin son toplanışına da çağrılmamışdı.

Bu və başqa məqamlarla bağlı fikirlərini öyrənmək məqsədilə Ceyhunla söhbətləşdik.

– Başa çatan mövsümdə çıxışını necə dəyərləndirirsən?
– Maksimumum olmadı, ancaq həm statistika, həm də oyun baxımından əvvəlki mövsümlə müqayisədə daha yaxşı olduğumu düşünürəm.

– “Zirə” mövsüm bitər-bitməz sənlə vidalaşdı. Səncə, komanda mövsümün sonuclarına görə avrokuboklara vəsiqə qazansaydı, yenə qərar belə olardımı?
– Bu qərar mənə məxsusdu və dəyişməyəcəkdi. Çünki komandadan ayrılmaq qərarını apreldə vermişdim. Mayda isə kubokun finalında oynadım. “Zirə”nin avrokuboklara vəsiqə qazanmasına yardım etmək istədim. Baxmayaraq ki, getmək qəti qərarım idi.

– Bəs, səni bu qərara sövq edən nə olmuşdu?
– Az şans qazanmağım. Daha çox oyun vaxtı almaq istəyirdim.

– Hazırda təkliflər varmı? Maraqlıdı, “Zirə” Konfrans Liqasında çıxış edəcəyi dəqiqləşəndən sonra səninlə əlaqə saxlayıbmı?
– Bəli, təkliflərim var və dəyərləndirirəm. “Zirə” ikinci dəfə təklif göndərməyib.

– Bəs, legioner həyatı yaşamaq ehtimalın varmı? Əcnəbi klublarla danışıq aparırsanmı?
– Əlbəttə, üstünlüyü legioner həyatı yaşamağa verirəm. Lakin bu gün nəyin necə olacağını bilmirəm.

– Millinin son toplanışına dəvət almamışdın. Bu nə ilə bağlıdı və sənə necə təsir etdi?
– Təbii ki, çox pis oldum. Çünki milli komandada oynamaq hər zaman prioritetimdi. Səbəb, yəqin ki, son iki ayda cəmi 60 dəqiqə meydanda olmağımdı. Düşünürəm ki, az oynadığıma görə dəvət almadım.

KƏNAN BAHADIR