Yenə “Kəpəz”lə bağlı qeyri-müəyyən durum yaranıb. İlin, demək olar, hər günü problemlər məngənəsində boğulan Gəncə təmsilçisinin indi faktiki nə rəhbəri var, nə də baş məşqçisi.

Əslində həmin vəzifələrin kimlərə həvalə olunacağına böyük ölçüdə aydınlıq gəlib. Daha əvvəl də xəbər verdiyimiz kimi, klubun yeni sədri Anar Abdullayev, baş məşqçisi isə Arif Əsədov olacaq. Ancaq təyinatlar yubanır. Düzdü, klub tərəfindən verilən açıqlamalarda artıq sənədləşmə prosesinin yekunlaşmaq üzrə olduğu bildirilir. Lakin hadisələrin axarından heç kimin gözü su içmir. Axı həm sabiq rəhbər Adil Vəliyevin, həm də baş məşqçi Azər Bağırovun postlarını tərk edəcəyi hələ mayın əvvəlindən bəlli idi.

Belədə ağla gələn yeganə variant budu ki, başverənlərin səbəbi “Kəpəz”in növbəti mövsümdən etibarən ev oyunlarını Gəncə şəhər stadionunda keçirəcəyidi. Heç şübhəsiz, yerli publika 15454 tamaşaçı tutumuna malik olan idman qurğusunu boş qoymayacaq. Gəncəli futbolsevərlərin tələbkarlığını, ciddi təzyiqini, məğlubiyyəti həzm edə bilməmələrini də nəzərə alsaq, klub rəhbərliyi və baş məşqçinin yükü yetərincə ağır olacaq. Öz aramızdı, bəlkə də Azər Bağırov məhz bu məqamları göz önünə gətirib, “Şamaxı”ya üz tutdu...

Kəsəsi, “Kəpəz” üçün iradəli, cəsarətli, məsuliyyətli, ən əsası dözümlü funksioner və mütəxəssis lazımdı. Bəs, əlini daşın altına qoyan tapılacaqmı? Əsas sual budu...

KƏNAN BAHADIR