Cəmi 4 gün əvvəl Masazırda bu komandalar qarşılaşdı və meydan sahibləri 3:1 hesabıyla qalib gəldi.

"Football-plus.az" xəbər verir ki, "bayquşlar" Sumqayıtda da qələbə qazanmaqla 7-ci pilləyə yüksəlməyə hədəfləyirdi.

"Kimyaçılar" isə 2-ci turdan təxirə salınan bu oyuna məğlubiyyətin əvəzini çıxmaq imkanı kimi baxırdılar. Oyuna meydan sahibləri daha fəal başladı. Xaçayev uzun reyd etdikdən sonra yaxşı “açılan” Kamranı gördü. Amma sonuncunun zərbəsinə Yusif seyvlə cavab verdi. 4-cü dəqiqədə isə Kamran qarşısıalınmaz zərbəylə hesabı açdı.

Hesabda geri düşən "Sabah" irəli atılsa da, oyun qarşılıqlı hücumlar şəraitində keçirdi. Parrisin cəhdi uğursuz alındı. "Kimyaçılar" buna Rövlanın qapının üstündən keçən zərbəylə cavab verdi. Qonaqlardan Sekidikanın sevinməsinə Mehdi imkan vermədi. 36-cı dəqiqədə Parrisin fərqlənməsinə qapıçı imkan vermədi. Hissənin sonlarına yaxın Kamranın iti bucaq atından zərbəsi toru yandan sirkələdi.

Beləliklə, "Sumqayıt" fasiləyə üstün yollandı. Masazır təmsilçisinin 2-ci yarıda fəallaşacağı gözlənilən idi. "Bayquşlar" ərazi üstünlüyünə malik olsalar da, 10 dəqiqə ərzində rəqib qapısı ağzında qol vəziyyəti yarada bilmədilər. 54-cü dəqiqədə Namik boş qapını yoxlasa da, son anda Rövlan qola imkan vermədi. Apehin hücumundan da nəticə hasil olmadı.

Meydan sahiblərindən Ninqa bərbad zərbəylə diqqət mərkəzinə düşdü. Aminin isə boş qapıya düşə bilmədi. 68-ci dəqiqədə Ninqa başla toru sirkələsə də, hakim ofsayd qeydə aldı. Namik zərbəsi zamanı Mehdi qola iimkan vermədi. Oyuna əlavə olunan dəqiqələrdə künc zərbəsi zamanı Yusif rəqibin cərimə meydançası qədər gəlib zərbə endirsə də, həmkarı topu tutdu. Son dəqiqələrdə "Sabah"ın baş məşqçisi Murad Musayevin hakimlə sözü çəp gəldi və yenə qırmızı alaraq meydandan qovuldu. Samir Abasov oktyabrın 21-də Masazırda qeydə alınan məğlubiyyətin əvəzini çıxdığına görə sevinə bilər.

Gözdən qaçmadı
* “Sumqayıt”ın azarkeşləri arasında stadiona nəvələriylə gələn ağbirçək nənələr də var idi. Yığmamızın köməkçi məşqçisi Arif Əsədov də oyunu izləyənlər arasındaydı.
* "Qarabağ"ın fəal qadın azarkeşlərindən olan Sevinc Məmmədova da stadiona təşrif buyuraraq "kimyaçılar"a dəstək verdi.
* Matç bitəndən sonra "Sumqayıt" futbolçuları qələbəni azarkeşləriylə birgə qeyd etdi. Qonaq komandanın Sumqayıta gələn fanatlarını isə "bayquşlar"dan İldar Alekperov, Tellur Mütəllimov, Elvin Camalov, Kahim Parris alqışladı. Azarkeşlər futbolçuları nə qədər yanlarına çağırıb fikirlərini çatdırmaq istəsələr də, onlar yalnız alqışlamaqla kifayətləndilər.

ABDULLA İSMAYILOĞLU