DÇ-2026-da 2-ci tura start verildi. Artıq pley-offun ilk iştirakçısı bəllidi.

"Football-plus.az" xəbər verir ki, A qrupunda Meksika Koreyanı 1:0 yenərək 2-ci qələbəsini qazandı. Bununla da Meksika 1/16 finala vəsiqəni rəsmiləşdirmiş oldu. B qrupunda İsveçrə Bosniya və Herseqovinanı 4:1 darmadağın etdisə, Kanada Qətərin başına bundan da betər oyun açdı. Doğma fanatları önündə oynayan Kanadanın DÇ tarixində qazandığı ilk qələbə unudulmaz alındı.

Belə ki, Cessi Marşın kollektivi Qətərin qapısına 6 cavabsız top vurdu! Ədalət naminə nominal qonaqların uzun müddət azlıqda oynadığını bildirək. 33-cü dəqiqədə Homam Əl-Əmin, 53-cü dəqiqədə Assim Modibo qırmızı vərəqə aldığından Xulen Lopeteqinin kollektivi son 40 dəqiqəni 9 futbolçu ilə oynamaq məcburiyyətində qaldı. 6 qoldan 3-nü Conatan Devid aktivinə yazdı. O, bu mundialda Lionel Messinin ardından het-trik edən ikinci futbolçu oldu.

Beləliklə, Kanada tarixi ərzində mundialda keçirdiyi 8-ci oyunda ilk qələbəsini qazandı. Bu komanda daha öncə DÇ-1986 və DÇ-2022-də iştirak etmiş, bu turnirlərdə bütün oyunlarda məğlub olmuşdu. Cari mundialın ilk turunda isə Kanada Bosniya və Herseqovina ilə 1:1 bərabərə qalmışdı.

DÇ-2026-da qırmızı vərəqələrin bolluğu da diqqət çəkir. Ötən mundialda 64 qarşılaşmada ümumilikdə 4 qırmızı vərəqə göstərilmişdisə, bu turnirdə ilk 28 oyunda artıq 6 qırmızı vərəqə göstərilib!