“Öncəliklə stadionda belə hadisələrin baş verməsi ilə qətiyyən razı deyiləm. Bütün klub azarkeşləri belə mövzularda daha səbirli davranmalı, komandaya ziyan vuracaq hansısa hərəkət etməməlidi. Təbii ki, söhbət həqiqi azarkeşlərdən gedir. Gəncə stadionunda başverənlərə gəlincə, tərəfdarlardan biri hakimin (Tural Qurbanov – red.) ardıcıl yanlış qərarları üzündən hisslərinə hakim ola bilmədi. Nəticədə xoşagəlməz hal yaşandı. Onu da deyim ki, həmin şəxs “Xəmsə”nin üzvü deyil. Ayrı sektorda əyləşmişdi. Sadəcə, oyunu izləməyə gələn yerli azarkeşlərdən biridi. Sözün açığı, belə azarkeş olmur. Biletə 3 manat vermək istəməyənlər klubu 800 manat ziyana salır. Stadiona gəlib tum çırtlamaq, komandaya dəstək olmaq əvəzinə vaxtını “əyləncəli” keçirmək istəyən şəxs deyə bilməz ki, mən “Kəpəz” azarkeşiyəm.

Digər cərimə isə azyaşlıların meydana daxil olmasına görə oldu. Məncə, “Kəpəz”in inkişafını istəyiriksə, daha məsuliyyətli davranmalıyıq. Həqiqətən də bu çətin zamanda belə halların baş verməsi düzgün deyil”.

“Hər azarkeş istəyər ki, komandası yuxarı pillələrdə qərarlaşsın. Lakin reallıqla barışmaz lazımdı. Kasad büdcə ilə nə qədər irəli gedə bilərsən ki? Ən azı 2023/24 mösvümündə premyer-liqanı tərk etməmək bizi qane edir. “Zirə” ilə oyundan isə ya heç-heçə, ya da qələbə gözləyirik. Rəqib güclü komandalardan biridi. Biz “Kəpəz”in yanındayıq. Sabah da həm Gəncədəki, həm də Bakıdakı azarkeşlər tribunalarda olacaq”.