Düzdü, klublarımızın avrokubokların 1-ci təsnifat mərhələsinin ilk oyunlarında qazandığı nəticələr hamını xeyli arxayınlaşdırıb. Hazırda kimsə onların növbəti mərhələyə vəsiqə qazanacağına şübhə etmir. Lakin Allah eləməmiş, pis sürprizlərə də hazırlıqlı olmalıyıq. Axı matçların taleyini təkcə azarkeş dəstəyi, komandaların performansı kimi məqamlar yox, həm də hakimlər həll edir və cavab görüşləri daha vacib olduğundan ədalət təmsilçilərinin hər birinin kimliyinə bələd olmaqda fayda var. Odu ki, "Football-plus.az"ın ənənəvi hakim təqdimatına keçid alaq.

Mateu Buskets Ferrer. Referi 1993-cü ildə Palma-de-Malyorkada anadan olub. Gənc yaşlarından hakimlik edən Ferrer hazırda peşəsini həm İspaniya La Liqasında, həm də beynəlxalq arenada davam etdirir. İlk rəsmi matçında 2022-ci ildə iş başında olan “fit sahibi” 2023-cü ildən bəri FİFA referisidi. O, indiyə qədər La Liqada 58 oyun idarə edib. “Qarapaltarlı” bu matçlarda 319 sarı, 20 qırmızı vərəqə göstərib. Bundan başqa, Ferrer beynəlxalq yoldaşlıq oyunları, 17 yaşadək futbolçular arasında Avropa çempionatı, U-20 komandalarının iştirakıyla keçirilən Libertadores yarışlarında baş hakim olub. Ədalət təmsilçisi avrokuboklarda debüt etməyib. Onun ilk matçı məhz “Sabah”ın səfər oyununa təsadüf edəcək. Ümumiyyətlə, “fit sahibi” karyerası ərzində 157 qarşılaşma idarə edib, bu görüşlərdə futbolçulara 859 sarı, 74 qırmızı vərəqə göstərib.

Mihali Kaprali. Söhbət hələ 18 yaşında yerli futbol federasiyasının hakimlik imtahanında yüksək nəticə göstərən, ardından aşağı liqa komandalarının matçlarını idarə etməyə başlayan ədalət təmsilçisindən gedir. Kaprali 1990-cı ildə Ukraynada dünyaya göz açsa da, Macarıstan vətəndaşıdı. O, yüksək liqada ilk matçını 2020-ci ildə idarə edib. İndiyə qədər bu çərçivədə 81 qarşılaşmada meydanda olan Kaprali 309 sarı, 9 qırmızı vərəqə ilə yadda qalıb. 2024-cü ildə FİFA hakimi dərəcəsini alıb. O vaxtdan bəri beynəlxalq yoldaşlıq oyunlarında, UEFA Gənclər Liqasında, 17, 19 və 21 yaşadək futbolçuların Avropa çempionatının seçmə mərhələsindəki çıxışlarında, Konfrans Liqasının təsnifat və əsas, Çempionlar Liqasının isə təsnifat mərhələlərində iş başında olub. Ədalət təmsilçisi Avropa Liqasında debüt etməyib.

Kaprali millimizin oyununda da baş hakim kimi görünüb. “Fit sahibi” yığmanın 2024-cü ildə Sombatxeydə Albaniyaya qarşı keçirdiyi yoldaşlıq matçında fəaliyyət göstərib. Həmin görüş rəqibin 3:1 hesablı qələbəsi ilə nəticələnib. Hakim həmin oyunda Emil Mustafayevi “sarı”yla cəzalandırıb.
Ümumiyyətlə, Kaprali karyerası ərzində idarə etdiyi 164 qarşılaşmada futbolçulara 677 sarı, 22 qırmızı vərəqə göstərib.

Marek Radina. Çexiyalı 1992-ci ildə Kolində dünyaya gəlib. Karyerasına aşağı liqada start verən ədalət təmsilçisi qısa müddətdə, daha dəqiqi, 2021-ci ildə əsas çempionatda forma geyib. O, bu yarışda meydanda olduğu 77 matçda 326 sarı, 23 qırmızı vərəqə ilə futbolçuları məyus edib. Radina 2023-cü ildən bəri FİFA referisidi. Hakim indiyə qədər bu çərçivədə UEFA Gənclər Liqasında, beynəlxalq yoldaşlıq oyunlarında, U-17, U-19 və U-21 komandalarının Avropa çempionatlarındakı matçlarında iş başında olub. Hələ Çempionlar Liqasında debüt etməyən Radinaya Konfrans Liqasının təsnifat və əsas, Avropa Liqasının isə yalnız təsnifat mərhələlərində güvənilib. Referi karyerası ərzində 186 matç idarə edib. O, bu qarşılaşmalarda 868 sarı, 46 qırmızı vərəqə göstərib.

KƏNAN BAHADIR