Böyük maraqla izlənilən, eyni zamanda bitmək bilməyən müzakirələrə səbəb olan DÇ-2026 yavaş-yavaş kuliminasiya nöqtəsinə yaxınlaşır.

"Football-plus.az" xəbər verir ki, 104 oyundan 100-ü artıq geridə qalıb. Ən maraqlıları isə hələ irəlidədi. Tarixdə ilk dəfə FİFA-nın son reytinqində ilk 4 pillədə qərarlaşan komandaların hamısı yarımfinala yüksəlib. Bütün yarımfinalçılar daha öncə dünya çempionluğunu qazanıb. Bu fakt isə buna qədər yalnız DÇ-1970 və DÇ-1990-da baş vermişdi. Qısası, televizorun önündə yerinizi möhkəmlədin. Çünki bizi tarixi duellər gözləyir.

yarımfinal
14 iyul
Fransa – İspaniya
Hakim: İvan Barton (Salvador)
Cəzalı: yoxdu
Stadion: “Ey-Ti-End-Ti” (Dallas)
Əvvəlki oyunlarının balansı: +13=7-18

Bu cütdə finala layiq bir oyun izləyəcəyik. Etiraf edək ki, hər iki komanda çox güclüdü və finalda oynamağa layiqdi. Hər iki tərəf təkcə həlledici matça vəsiqə qazanmağa yox, həm də adını tarixə yazdırmağa çalışacaq. Məsələ burasındadı ki, İspaniya artıq 36 oyundu uduzmur. Burda söhbət əsas və əlavə vaxtda uduzmamaqdan gedir. İspanlar bu görüşdə də məğlub olmayacaqları təqdirdə İtaliyaya məxsus rekordu (37) təkrarlayacaqlar! Luis de la Fuentenin komandası sonuncu dəfə 2024-ün martında yoxlama oyununda Kolumbiyaya boyun əyib (0:1).

Maraqlıdı ki, DÇ-2022-nin ilk oyununda Argentina da italyanların rekordunu təkrarlamaq ərəfəsində idi. Amma o vaxt “albiselesta” sürpriz şəkildə Səduiyyə Ərəbistanına uduzdu! Digər tərəfdə isə Fransa ardıcıl 3-cü finalın astanasındadı. Daha öncə bunu Avropa ölkələrindən yalnız Almaniya (1982, 1986, 1990) bacarıb. Yığmanın başında son oyunlarını keçirməyə hazırlaşan Didye Deşam, təbii ki, tarixə düşmək arzusundadı. Baş məşqçi kimi ardıcıl iki mundialı daha öncə yalnız italiyalı Vittorio Potso (1934, 1938) bacarıb. Əzəmətli Mbappenin liderlik etdiyi Fransa bu turnirdə məhsuldarlığı ilə diqqəti çəkir. 16 qol vuran fransızlar Argentinadan sonra ən məhsuldar ikinci komanda statusundadı. Komanda oyunu ilə göz oxşayan son Avropa çempionu İspaniya isə yalnız bir qol buraxması ilə öyünə bilər. Fransa keçirdiyi bütün oyunlarda qələbə qazanıbsa, İspaniya yalnız sürpriz şəkildə müdafiəsini yara bilmədiyi Kabo Verde ilə görüşdə büdrəyib. Fransa həm də bu rəqibdən son dönəmlərdəki uğursuzluqların qisasını almağa çalışacaq. Axı həm ötənilki Millətlər Liqasının, həm də son Avropa çempionatının yarımfinalında ispanlar fransızlardan üstün olub.

Ümumiyyətlə, DÇ-2006-nın 1/8 finalında qeydə alınan 3:1-lik qələbədən bəri Fransa İspaniyaya qarşı keçirdiyi 9 oyunun yalnız ikisində qalib gəlib. Ona görə də şəxsi oyunlarda İspaniyanın 18:13 öndə olması təəccüb doğurmamalıdı. Mərakeşlə oyunda Mbappenin zədə üzündən əvəzlənməsi yarımfinal ərəfəsində fransalı fanatları narahat etməyə bilməz. Düzdü, Messi ilə hər cəhətdən bombardirlik uğrunda mübarizə aparan Mbappenin zədəsinin ciddi olmadığı deyilir. Hər halda, o son məşqlərdə iştirak edib. Amma zədə ona mane olsa, bu, Fransa üçün çox ciddi zərbə olacaq.

15 iyul
İngiltərə - Argentina
Hakim: açıqlanmayıb
Cəzalı: C.Kuansa/yoxdu
Stadion: “Mersedes-Bents” (Atlanta)
Əvvəlki oyunlarının balansı: +6=5-3

Klub futbolunda qüdrətini göstərməyə müvəffəq olan İngiltərə yığma səviyyəsində heç cür “şeytanın qıçını qıra” bilmir. DÇ-1966 hələ də ingilislərin finala yüksəldikləri, eləcə də çempion olduqları sonuncu turnirdi və bu baxımdan komanda növbəti dəfə tarixi anın astanasındadı. İngiltərəli fanatlar artıq “it`s coming home” oxumaqdan təngə gəliblər və bunun, nəhayət, reallaşmasını arzulayırlar. Bu aspektdən yanaşanda İngiltərənin üzərində böyük təzyiq olduğunu vurğulamağa dəyər. Çünki Messili Argentina onsuz da dünya çempionudu. Yarımfinalda məğlubiyyət dünyanın sonu olmayacaq. Messi onsuz da yetərincə tarix yazıb və bu oyunun nəticəsindən asılı olmayaraq, yığma karyerasını major notda bitirəcək.

Bukmekerlər “üç şir”i favorit sayır. Bunu anlamaq olar. Argentina bu turnirin pley-offunda nəinki İsveçrə, hətta Kabo Verde və Misir kimi iddiasız komandalarla oyunlarda da ciddi problemlər yaşayıb. “Albiselesta” gah hakimlərin, gah rəqiblərin tez həvəsdən düşməsinin, gah da bəxtin hesabına hər dəfə çətinliyin öhdəsindən gələ bilib. Amma bəxt və ya 39 yaşlı Messinin sehri hər dəfə işə yaramaya bilər. Əla formada olan Bellingem – Keyn dueti bu turnirin hər oyununda qol buraxan Argentinanın müdafiəsinə çətin anlar yaşada bilər. İngilislərin vurduğu 13 qoldan 12-si məhz bu iki futbolunun hesabındadı. İsveçrə göstərdi ki, Messinin qarşısını kəsmək mümkündü. Leo həmin matçda bəlkə də turnirdəki ən zəif oyununu keçirdi. Eyni şeyi ingilislərin daha təcrübəli və səviyyəli müdafiəçiləri də etməyə çalışacaq. Yeri gəlmişkən, Messi karyerasında ilk dəfə İngiltərə yığmasına qarşı oynayacaq. İngiltərə klubları onun sevimli rəqiblərindəndi (36 oyun, 29 qol). Görək yığma səviyyəsində işlər necə alınacaq...

Ümumiyyətlə, İngiltərə ilə Argentinanın yolu son 20 ildə kəsişməyib. Komandaların son dueli 2005-in noyabrına təsadüf edib. O vaxt Cenevrədəki yoxlama oyununda ingilislər 3:2 üstün olmuşdular. Mundiallarda isə bu komandaların yolu dəfələrlə kəsişib və hər duelə aid az qala ayrıca kitab yazmaq olar. Təbii ki, komandaların ən yaddaqalan oyunu DÇ-1986-nın 1/4 finalında Maradonanın həm yaxşı, həm də pis mənada şou göstərdiyi qarşılaşmadı. İngiltərə şəxsi oyunlarda həm DÇ-lərdə (3:2), həm də ümumilikdə (6:3) üstündü.