Ponomaryov: “Mikels "Sabah"dan getmək fikirində qətidisə, biz nəsə edə bilmərik”
Son iki gündə Azərbaycan futbolunda ən populyar adam Coy-Lens Mikelsdi.
"Football-plus.az" xəbər verir ki, RFŞ-lə oyun günü Masazırda “Bakılı balasıyam” mahnısına oynayan almaniyalı yarımmüdafiəçi indi də iki ayağını bir başmağa dirəyib və Səudiyyə Ərəbistanından aldığı təklif gözünü necə qamaşdırıbsa, “Sabah”dan getmək istəyir.
Hələ ki adı çəkilməyən klubun 700 min avro ödəməklə onu transfer edə biləcəyi deyilir. “Sabah”la cari mövsümün sonuna qədər müqaviləsi olan futbolçunun hətta "Partizan"la qarşıdakı oyunda iştirakı da sual altındadı. Baxmayaraq ki, onun meydanda olmaması “tələbələr”in Serbiya nəhəngini sıradan çıxarmaq şansını ciddi şəkildə azaldacaq. Bu yöndə redaksiyamıza başqa bir xəbər də daxil olub. Mikels "Qəbələ" ilə oyundan əvvəl klub prezidenti Maqsud Adıgözəlovla görüşərək Səudiyyə Ərəbistanı təmsilçisinə keçidinə maneə törədiləcəyi təqdirdə "Partizan"la oyuna çıxmayacağını deyib. Bu məqama aydınləq gətirmək üçün klubun idman direktoru və Müşahidə Şurasının üzvü İqor Ponomaryova müraciət etdik:
"Mikelsin Səudiyyə Ərəbistanının klubuna keçmək istəməsi xəbəri doğrudu. Futbolçunun müqaviləsində belə bir bənd var. Daha sərfəli təklif gələcəyi təqdirdə Mikels özü kluba təzminat ödəyib başqa komandaya keçə bilər. "Sabah"dan getmək fikirində qətidisə, biz nəsə edə bilmərik. Çünki faktiki ortada müqavilə şərti var. Mikelsin "Partizan"la oyunda bizə kömək edib-etməyəcəyi hələ ki sual altındadı. Onun klub prezidenti Maqsud müəllimlə görüşüb şərtlər diqtə etməsinə gəlincə, bu barədə heç bir məlumatım yoxdu. Bu sualı klub prezidentinə ünvanlasaz, yaxşı olar. Amma inanmıram ki, futbolçu "Sabah" rəhbəri qarşısında təkidlə, hədəylə şərt qoysun. Çünki Mikels yetərincə mədəni, təmkinli adamdı. İndiyə qədər nə futbolçuya klubda hörmətsizlik olub, nə də ondan hörmətsizlik görmüşük".
ABDULLA İSMAYILOĞLU
Digər xəbərlər
