...yox-yox, ağlınıza başqa şey gəlməsin, onların da balası olacaq.

Masazırda şəninə səslənən “bakılı balasıyam” melodisinin “üçü çıxmamış” Coy-Lens Mikels “Sabah”dan ayrılmağa qərar verdi. Bununla da “tələbələr”in “Partizan”ı keçmək şansı önəmli dərəcədə azaldı. İclaslarımızda dəfələrlə demişəm, indi burda təkrarlamaqda qəbahət görmürəm: Mikels Azərbaycan çempionatında oynayan üç ən parlaq ulduzdan biri idi. Bəli, məhz idi, onun haqqında artıq keçmiş zamanda danışa bilərik. Dünya futbolunu baş-ayaq çevirən Səudiyyə Ərəbistanının hansısa klubu almaniyalı yarımmüdafiəçinin ayaqları altına pulu xəzəl kimi tökür. Təbii, “Sabah” bu transferdən ciddi pul qazanacaq, çox güman, “Partizan”ı keçməyə görə UEFA-nın ayıracağı məbləğdən daha artıq. Pul qazanacaqlar, fəqət bu mərhələni də keçsəydilər, debütdəcə Avropada ad-san da qazanacaqdılar.

Əslində bu məsələdə qeyri-adi heç nə yoxdu. Peşəkar futbol dünyasında alırlar, satırlar, icarəyə verirlər, Mbappe kimi ulduzu mövsüm boyunca ehyiyatda oturtmaqla da təhdid edirlər. Amma və lakin... “Bakılı balasıyam”ın melodisi altında o cür şıdırğı oynamaq, özünü publikaya bizlərdən biri kimi təqdim etmək nə idi, elə ilk imkandaca ərəblərin qucağına tullanmaq nədi? Gedirsən-get, amma mənə elə gəlir ki, “Partizan”la oyunlardan sonra da getmək olar. Hələ “transfer pəncərəsi”nin bağlanmasına çox var. Yaşın da 35 deyil ki, bunun son şans olduğunu düşünəsən. Kəsəsi, ilin-günün bu vaxtında, daha dəqiqi, “Sabah” üçün taleyüklü oyunlar ərəfəsində Mikels yüngülcə cığallıq edir, onun üçün “bakılı balasıyam”ı oxuyan azarkeşlərin ümidlərini puça çıxarır. “Bakılı balası” idi, bundan sonra olacaq ərəbin...

ORXAN