Mikels hələ Bakıdadı, ancaq...
"Sabah"ın almaniyalı yarımmüdafiəçisi Coy-Lens Mikels komandanı tərk edə bilər.
Bu haqda bəzi saytlar və sosial şəbəkə səhifələri məlumat yayıb. İddialara inansaq, Səudiyyə Ərəbistanı təmsilçilərindən biri futbolçuya "elçi çıxıb". Üstəlik 29 yaşlı yarımmüdafiəçinin müqaviləsində olan bəndə əsasən hansısa klub 700 min avro ödəməklə onu transfer edə bilər.
Bu xəbərin doğru olub-olmadığını dəqiqləşdirmək məqsədilə "Sabah"ın mətbuat xidmətinin rəhbəri Elnur Həmidovla əlaqə saxladıq. Onun "Football-plus.az"a söylədikləri:
"Bəli, təkcə Mikelsin yox, bir çox oyunçunun müqaviləsində elə bənd var. Amma məxfilik baxımından məbləği açıqlamaq düzgün olmaz. Sözügedən futbolçumuza Səudiyyə Ərəbistanı da daxil olmaqla bir neçə ölkədən təklif var. Rəsmi anlaşma əldə ediləndə bu haqda ictimaiyyətə ətraflı məlumat veriləcək. O hələ ki Bakıdadı. Heç yerə getməyib".
Klub rəsmisinin saytımıza dediyinə görə, Mikelsin cümə axşamı keçiriləcək "Sabah" - "Partizan" matçında iştirakı sual altındadı.
Qeyd edək ki, təcrübəli hücumçu "tələbələr"in UEFA-ya göndərdiyi iştirak ərizəsində yer alıb. Mikelsin "Sabah"la müqaviləsinin müddəti 2023/24 mövsümünün sonuna qədərdi.
KƏNAN BAHADIR
