İyunun 24-də 17-ci dəfə start götürən KONKAKAF-ın Qızıl Kubokuna iyulun 16-da yekun vuruldu.

"Football-plus.az" ABŞ və Kanadanın şərikli təşkil etdiyi turnirin qalibi Meksika yığması oldu.

final
Meksika – Panama 1:0 (0:0)
Meksika: Oçoa, Qalyardo, Montes, X.Sançes, Vaskes, Pineda (Reyes, 90+2), Çaves (E.Sançes, 75), Alvares, Romo, Martin (S.Ximenes, 85), Antuna (Alvarado, 75).
Panama: Moskera, Devis (Anderson, 62), Kamminqs (Londonyo, 90+1), Eskobar, Andrade, Kintero (Uoterman, 61), Qodoy, Karraskilya, Barsenas, Dias, Faxardo.
Qol: S.Ximenes, 88.
Vərəqələr: Vaskes, 11. Kamminqs, 21. Montes, 45+3. Qalyardo, 54. Karraskilya, 55. Alvares, 60. Qodoy, 64. Moskera, 90+6 - sarı.
Hakim: Ektor Martines (Salvador).
16 iyul. İnqlevud. 72963 tamaşaçı.

Budəfəki turnirin diqqəti daha çox cəlb edən faktı təşkilatçı ölkələrin komandalarının finala çıxa bilməməsi oldu. Xatırladaq ki, ABŞ yığması 1/4 finalda Kanadaya 2:2 hesabıyla nəticələnən oyundan sonra labüd olan penalti seriyasında üstün gələ bilmişdi. Lakin Brayan Kallaqanın çalışdırdığı komanda yarımfinalda Panamaya məhz “lotereya”da (1:1, p. - 4:5) uduzmuşdu. Meksikanın finala çıxacağı isə gözlənilirdi. Xayme Losanonun komandası 1/4 finalda yarışda dəvətli statusu ilə çıxış edən Qətəri 4, yarımfinalda isə Yamaykanı 3 cavabsız qolla məğlub etmişdi.
Panama və Meksika yığmaları arasındakı final Kaliforniya ştatının İnqlevud şəhərində keçirildi. Bazar günü “SoFi Stedium”un səhnə olduğu matça maraq yetərincə böyük idi: finalı təxminən 73 min tamaşaçı izlədi. Gözlənildiyi kimi, oyun meksikalıların üstünlüyü şəraitində keçdi. Onların hücumçusu Martin 33-cü dəqiqədə qapıya yol tapsa da, qol ofsayd üzündən qeydə alınmadı. Meksikanın hesabı erkən aça bilməməsi rəqibin müdafiədə sıx oynamasıyla bağlı idi. Müdafiə xətti yarılanda isə panamalıların qapıçısı xilaskar rolunda çıxış edirdi. 28 yaşlı Moskera oyun ərzində 6 epizodda komandasını qoldan xilas etdi.

Məhz onun inamlı oyunu sayəsində əsas vaxtda qolsuzluq pozulmaya bilərdi. Lakin finalın favoriti sayılan meksikalılar taleyini əlavə vaxta və ya penalti seriyasına saxlamaq fikrindən uzaq idilər. Losanonun 75-ci dəqiqədən başlayaraq etdiyi əvəzetmələr qələbənin əsas vaxtda təmin olunmasına hesablanmışdı. Bu planı meydana məhz sonradan çıxan futbolçu yerinə yetirdi. Mübarizəyə 85-ci dəqiqədə qoşulan “Feyenoord”un 22 yaşlı hücumçusu Santyaqo Ximenes az sonra Pinedanın ötürməsi ilə tilsimi qırdı. Rəqibin məğlubiyyətdən qaçmaq üçün lazımi qədər vaxtı qalmamışdı və Panama KONKAKAF-ın Qızıl Kubokunda 3-cü dəfə finalda uduzdu. Meksika isə 9-cu çempionluğu rəsmiləşdirməklə sahibi olduğu rekordunu yenilədi. Bu, Meksika yığmasının baş məşqçi vəzifəsinə iyunda təyinat alan 44 yaşlı Losanonun rəhbərliyi altında qazandığı ilk titul oldu.

Turnirin bütün finalları
il təşkilatçı final

1991 ABŞ ABŞ – Honduras 0:0, p. – 4:3
1993 Meksika, ABŞ Meksika - ABŞ 4:0
1996 ABŞ Meksika - Braziliya 2:0
1998 ABŞ Meksika - ABŞ 1:0
2000 ABŞ Kanada - Kolumbiya 2:0
2002 ABŞ ABŞ – Kosta Rika 2:0
2003 Meksika, ABŞ Meksika - Braziliya 1:0
2005 ABŞ ABŞ – Panama 0:0, p.- 3:1
2007 ABŞ ABŞ - Meksika 2:1
2009 ABŞ Meksika - ABŞ 5:0
2011 ABŞ Meksika - ABŞ 4:2
2013 ABŞ ABŞ – Panama 1:0
2015 Kanada, ABŞ Meksika - Yamayka 3:1
2017 ABŞ ABŞ – Yamayka 2:1
2019 Kosta Rika, Yamayka, ABŞ Meksika – ABŞ 1:0
2021 ABŞ ABŞ - Meksika 1:0
2023 Kanada, ABŞ Meksika - Panama 1:0