Şimali və Mərkəzi Amerika və Karib hövzəsi (KONKAKAF) üzrə 2021-ci ilin ən yaxşı futbolçusunun adına aydınlıq gəlib.

KONKAKAF-ın rəsmi saytının məlumatına görə, ötən ilin ən yaxşı oyunçusu üçün ayrılan mükafata Kanada millisinin 21 yaşlı müdafiəçisi Alfonso Devis layiq bilinib. Qeyd edək ki, o, regionda bu adı qazanan ilk kanadalı kimi tarixə düşüb. 2018-ci ildən “Bavariya”da oynayan Alfonso KONKAKAF-a daxil olan 41 milli federasiyanı təmsil edən məşqçilər, oyunçular və jurnalistlər, həmçinin azarkeşlər arasında keçirilən sorğuda 1-ci yeri tutub. Nominantlar sırasına Mikael Antonio (“Vest Hem”, Yamayka), Conatan Devid (“Lill”, Kanada), İrvinq Losano (“Monako”, Meksika), Ueston Makkenni (“Yuventus”, ABŞ) və Kristian Pulişiç (“Çelsi”, ABŞ) də daxil idi.
Yeri gəlmişkən, Devis ölkəsində də ötən ilin ən yaxşı futbolçusu seçilmişdi. Əslən qanalı olsa da, 5 yaşından Kanadanın Edmonton şəhərində yaşayan futbolçu ötən il ardıcıl 3-cü dəfə Almaniya çempionu olmuşdu.

Şimali və Mərkəzi Amerika və Karib hövzəsində 2021-ci ilin ən yaxşı qadın futbolçusu da müəyyənləşib. Bu nominasiyada ABŞ yığmasının və “Portlend Torns”un oyunçusu Kristal Dann qalib gəlib.