"İsveç çempionatı ilə Azərbaycan premyer-liqasını müqayisə etsək, skandinavlar bizdən çox-çox üstündü. Bunu faktlarla əsaslandırım. Əvvəla, İsveç çempionatının və ordakı komandaların hər birinin tarixi, ənənələri, nailiyyətləri var. Orda yalnız derbi yox, bütün qarşılaşmalar böyük coşqu ilə keçir. Hamı stadiona axışır, tribunalar dolur, necə deyərlər, anşlaq olur. Fanatların dəstəyi, qarşıdurmaları möhtəşəmdi. Belə ab-havada çıxış etməyin özü artıq yenilik və inkişafdı. Bundan başqa, İsveç çempionatını top-liqa təmsilçilərindən olan skautlar, seleksiyaçılar da izləyir. Yəni İsveç çempionatında oynamaqla Avropanın aparıcı liqalarına da keçmək olar. Ona görə də mənə çatmır, Azərbaycan çempionatı ilə İsveçi necə müqayisə edib, onların bizdən zəif olduğunu deyirlər? Fikrimcə, Musa gələcək karyerasında zirvələri fəth etmək üçün çox düzgün seçim etdi. Bundan sonra hər şey özündən asılıdı. Musa son mövsümdə yaxşı çıxış edərək vitse-bombardir oldu. Yığmada da şans qazandı, qol hesabını açdı. Amma indi "Yurqorden"də ikiqat qüvvə ilə tər tökməlidi. Üzərində maksimum işləsə, İsveç çempionatında diqqət mərkəzinə düşəcək. "Yurqorden" ənənəsi, tarixi ilə öyünən komandadı. Bundan başqa, Musanın İsveçdə sıxıntı çəkəcəyini düşünmürəm. Çünki orda çoxlu azərbaycanlı yaşayır, böyük diasporumuz var. Hətta İsveçdəki səfirimiz Zaur Əhmədov da futbolsevərdi. Onun da futbolçumuza hər cür kömək və dəstək verəcəyinə inanıram. Ümumiyyətlə, başda özüm olmaqla Musanın İsveçdə darıxmaması üçün əlimizdən gələni etməyə hazırıq. Onu təbrik edir, ilk legioner həyatında uğurlar arzulayıram. Musaya inamımız böyükdü”.