"Güclü yığmalarla bir qrupa düşmüşük. Millimizin işi çox çətin olacaq. Könül istərdi ki, qrupda 1-2-ci yerlər uğrunda mübarizə aparaq. Amma reallıq budu ki, millimiz hələ o potensiala malik deyil. Belçika liderliyi heç kimə verməyəcək. Avstriya ilə İsveç 2-ci yer uğrunda mübarizə aparacaq. Millimiz isə 4-cü yerdə möhkəmlənəcək. Bəxtimiz gətirsə və hər 2 oyunda Estoniyanı məğlub etsək, Avstriya və İsveç də xallar itirsə, ən yaxşı halda 3-cü pillə uğrunda döyüşə bilərik. İsveç millisində hazırda nəsildəyişikliyi getsə də, bizdən güclüdülər. Heyətlərində İngiltərə, İtaliya, İspaniya kimi ölkələrin top-liqalarında çıxış edən oyunçular var. Bundan başqa, İsveçdə uşaq futbolu çox güclüdü, akademiyalarında uzun illərdi səriştəli iş, seleksiya gedir. İstənilən halda, millimizə qarşıdan gələn oyunlarda uğurlar arzulayıram”.