"Bildiyiniz kimi, artıq sponsorumuz var. Şükürlər olsun ki, cəhdlərimiz boşa getmədi. Yeni mövsümdə daha iddialı olacaq, çempionluq uğrunda mübarizə aparacağıq. Yenidən elitada oynamaq istəyirik. Sponsorun əsas şərtlərindən biri də daha təcrübəli məşqçiylə yola davam etməkdi. Ona görə komandanın “sükanı arxasına” PRO və ya A kateqoriyalı mütəxəssis gətirəcəyik. Bir neçə namizəd var ki, Cavid Hüseynov da bu sıradadı. Hələ ki yekun qərara gəlməmişik. Qarşıdakı həftələrdə yeni baş məşqçinin adına aydınlıq gələcək. Ruhid müəllimə gəlincə, onun klubdakı işi, zəhməti göz önündədi. Heç kim də bunu dana bilməz. Usubov təkbaşına həm baş məşqçi, həm idman direktoru idi, həm də uşaq futboluna nəzarəti üzərinə götürmüşdü. Onun xidmətində köməkçi məşqçi və ya başqa vəzifədə maraqlıyıq. Ruhid müəllim C kateqoriyalı məşqçidi, hazırda B-ni almaq üçün müraciət edib. PFL-in müvafiq qanunlarına görə 1-ci liqa təmsilçisinin baş məşqçisi ən azı B kateqoriyasına sahib olmalıdı. Hələ ki komandada səlahiyyətli şəxs Ruhid Usubovdu"

"Peşəkarlaşmaq, daha iddialı komanda olmaq istəyiriksə, təcrübəli mütəxəssis baş məşqçi postunda olmalıdı. Mən də bu məsələdə klub rəhbərliyi ilə həmrəyəm. Ötən il uzun fasilədən sonra yenidən İmişliyə böyük futbol qayıtdı. Çempionatın sonlarına yaxın ev oyunlarını doğma publika önündə keçirməyə icazə verildi. Azarkeş dəstəyi də göz qabağında idi. Ev oyunlarımıza 4-5 min fanat gəlirdi. Belə möhtəşəm dəstəyi olan komada daha yaxşı yerlərə layiqdi. Ona görə də böyüməli, inkişaf etməliyik. Ən böyük arzum odu ki, "İmişli" yenidən elitada oynasın. Bunun üçün əlimdən gələn hər şeyi edəcəm. Rəhbərliklə münasibətlərimiz əladı. Onlar həmişə mənə xüsusi qayğı ilə yanaşıb, bu gün də elədi. Sponsor şərt irəli sürüb ki, komandaya daha peşəkar baş məşqçi gətirilsin. Rəhbərlik də mənim köməkçi vəzifəsində qalmağım şərtiylə buna razılıq verib. Mənə uşaq futbolunda əlaqələndirici və başqa vəzifələr də təklif olunmuşdu. Amma köməkçi vəzifəsində qalmağı üstün tutdum. Özümü baş məşqçi kimi tam yetişdirmək, yeni gələcək mütəxəssisin rəhbərliyi altında təcrübə toplamaq istəyirəm. Yəni baş məşqçi dəyişikliyi mənim xeyrimədi. Ötən il təkbaşına komandaya rəhbərlik etdim, çətinliklərə rəğmən, İmişlidə futbolu yaşatdıq. Artıq yaşayan yox, yaşamaqla nümunə olan "İmişli" formalaşmalı və zirvələri fəth etməlidi. Yeni baş məşqçinin adına aydınlıq gələnə qədər komandanı məşqlərə çıxaracam. Qarşıya qoyduğum əsas məqsədlərdən biri də məşqçi kurslarına qatılmaq və bütün kateqoriyalara yiyələnməkdi".