Messi seriala çəkildi
Lionel Messi karyerasını Amerikada davam etdirmək qərarına gələndən sonra populyarlığını bir qədər də artırıb. Ulduz futbolçu ilə bağlı son xəbərləri nəzərinizə çatdırırıq.
“Football-plus.az” xəbər verir ki, əvvəlcə onun Liqa 1-də 2022/23 mövsümünün ən yaxşı əcnəbi futbolçusu seçildiyini bildirək. Bu barədə turnirin “tvitter” səhifəsi məlumat yayıb. Qeyd edək ki, argentinalı hücumçu ötən mövsüm PSJ-nin formasında Liqa 1-də 32 matça çıxıb, 16 qol vurub və eyni sayda məhsuldar ötürmə verib.
İyunda azad agent kimi Paris klubundan ayrılan Messi daha bir nominasiyanın qalibi olub. O, Çempionlar Liqasının 2022/23 mövsümünün ən baxımlı qolunun müəllifi kimi mükafat qazanıb. Bu nominasiyada Lionelin PSJ-nin heyətində “Benfika”ya vurduğu qol qalib gəlib. Azarkeşlər UEFA-nın saytında keçirilən sorğuda bu qola daha çox səs veriblər. Argentinalı hücumçu qrup mərhələsinin 3-cü turunun Lissabinda keçirilən oyununun (1:1) 22-ci dəqiqəsində qapıya yol tapmışdı. O, digər nominantları – ilk yarımfinal matçında (1:1) “Mançester Siti”yə qol vuran “Real”ın vingeri Vinisius Junioru və MS-nin formasında sabiq komandası Dortmund “Borussiya”sı ilə qrup oyununda (2:1) fərqlənən Erlinq Holannı arxada qoyub.
Ötən ay “İnter Mayami”yə keçən Messinin yeni klubunda nə qədər qazanacağı məlum olub. Bunu ABŞ klubunun prezidenti Xorxe Mas açıqlayıb. O, “El Pais” qəzetinə belə deyib:
“Müqaviləyə əsasən, Leo ildə təxminən 46-55 milyon avro qazanacaq. Onunla danışıqlar aparmaq üçün çox vaxt sərf etdik. Mən onun atası Xorxe ilə həmişə əlaqə saxlayırdım. Devid Bekhem (klubun həmsahibi - red.) Leo ilə sırf futbolla bağlı dialoq aparıb, çünki özü də vaxtilə peşəkar oyunçu olub. Heç kim Messiyə təzyiq etmək istəmirdi. Ona görə də biz onunla Barselonada, Mayamidə, həmçinin Rosario və Dohada danışdıq. Dünya çempionatı boyunca Argentina millisinin və Messinin oyununu diqqətlə izləmişdim”.
“İnter Mayami”nin dünya çempionu ilə 3 illik müqavilə bağladığı haqda xəbərlər yayılmışdı. Artıq yaşıl meydanda arzuladığı bütün titullara sahib olan Messi özünü aktyor kimi sınayıb. O, Argentina teleserialının “Los Protectores” seriyasında rol alıb. Öz rolunu oynayan futbolçunun olduğu səhnədə argentinalı və kolumbiyalı aktyorların oynadığı başqa üç personaj, futbol agentləri var. Messi komediya səhnəsinin əsas obyektidi. Çünki agentlər onunla 36 yaşlı futbolçunun hər gün fərqli bir divizionda fərqli bir klubda oynayacağına imkan verəcək bir iş müqaviləsi bağlamağa çalışırlar.
Lionellə bağlı digər məlumatı Xuan Laporta yayıb. Sən demə, “Barselona” sabiq futbolçusuna hələ də maaş ödəyir. İspaniya klubunun prezidenti Xuan Laporta “Mundo Deportivo”ya açıqlamasında belə deyib:
“Biz Lionel ilə əla bir şəkildə vidalaşacağıq. Bunu yeni “Nou Kamp”ın açılışında etmək ideal olardı. Biz ona 2025-ci ilə qədər maaş verməliyik, çünki əvvəlki rəhbərliyin dövründə ona çatmalı olan məvacibini təxirə salmışdı”.
Qeyd edək ki, Messi koronavirus pandemiyası zamanı – 2020-ci ildə kluba dəstək olmaq məqsədi ilə maaşının azaldılmasına razılaşmışdı. O, məvacibinin bir hissəsini qarşıdakı illərdə alacağını gözləyirdi. Amma 2021-ci ildə “Barselona” ilə müqaviləni yeniləyə bilmədiyi üçün komandadan azad agent kimi ayrılaraq PSJ-yə keçmişdi.
Digər xəbərlər
