Fransa çempionatının aşağı dəstəsində sonuncu turun oyunları iyunun əvvəlində keçirilib. Ancaq turnir cədvəlinin yekun durumu yalnız bazar ertəsi formalaşdı.

Əslində “Bordo”ya texniki məğlubiyyət verildi” sərlövhəli xəbərdə məsələnin mahiyyətinə toxunmuşduq. Sadəcə, son vaxtlar bütün dünyada tribunalarda zorakılıq halları geniş vüsət aldığından, ölkəmizdə də azarkeşlərin davranışına görə kimin məsuliyyət daşıması ilə bağlı məsələ zaman-zaman aktuallıq qazandığından mövzunu inkişaf etdirməyə qərar verdik.

Bildiyiniz kimi, “Bordo” – “Rodez” oyunu yarımçıq qalıb. Çox ilgiçəkən qalmaqal üzündən: “Bordo”nun azarkeşi tribunadan vurduğu qolu bayram edən “Rodez”in oyunçusunun üzərinə hücum çəkib. Nəticədə futbolçu yerdə qalıb və onu meydandan xərəkdə çıxarıblar. Oyun davam etdirilməyib. Bu həftənin bazar ertəsi “Bordo”ya rəsmi şəkildə texniki məğlubiyyət verilib. Bu qərar isə Bretoniya klubunun elita arzusunun üzərindən xətt çəkməklə yanaşı, “Rodez”ə xilas olmaq imkanı yaradıb.

Nə baş verib?

Son turda üz-üzə gələn “Bordo” ilə “Rodez”dən hər birinin bitməmiş işi var idi. “Mets” ilə elitaya yüksəlmək uğrunda qiyabi mübarizə aparan meydan sahibləri 5 və daha artıq top fərqi ilə qələbə qazanmalıydılar, qonaqlar isə 3-cü diviziona yuvarlanmaq təhlükəsiylə qarşılaşmışdılar.

Təbii ki, “Bordo” oyun başlayan kimi hücuma atılıb. Ancaq hesabı 22-ci dəqiqədə gözlənilmədən “Rodez”açıb. Qolun müəllifi Lük Buade sevincini oyundaşları ilə bölüşərkən “Bordo”nun fanatı özünü onlara çatdıraraq arxadan itələyib. Lük və həmklubu dərhal özünü yerə atıb. Onların xarici görünüşündən çox ağrı keçirdikləri görünüb. Oyun dayandırılıb – komandalar paltardəyişmə otağına yollanıb. Referi Nikolya Reynvill 40 dəqiqəlik iclasdan sonra qərar verib ki, oyun davam etdirilməyəcək, futbolçuda beyin silkələnməsi qeydə alınıb.

Beləliklə, texniki məğlubiyyəti rəsmiləşən “Bordo” “Mets”i elitaya buraxıb. Üstəlik jirondistlər növbəti mövsümə -1 xal ilə başlayacaq. Klubun rəsmi bəyanatında deyilir: “Fransa Futbol Liqasının İntizam Komissiyası həm anlaşılmaz, həm də işin elementləri və presedent hüququ ilə uyğun gəlməyən qərar verib. “Bordo” klubu adından biz artıq hüquqlarımızın və idman ədalətinin qorunmasına yönəlmiş addımlar atırıq”.
Maraqlıdı ki, “Bordo” bu insidentdən ziyan görən yeganə tərəf deyil. “Rodez”ə qələbə verildiyindən 3-cü diviziona “Annesi” yollanmalı oldu. Son mövsümdə sensasiyalı şəkildə kubokun yarımfinalına qədər irəliləyən bu komanda 45 xal toplayıb ki, bu nəticə ötən mövsümdə hətta 14-cü yeri tutmağa bəs edərdi.

1. Havr 38 75
2. Mets 38 72
3. Bordo 38 69
...14. Rodez 38 46
15. Laval 38 46
16. Valansyenn 38 45
17. Annesi 38 45
18. Dijon 38 42
19. Nim 38 36
20. Nyor 38 29

“Bordo” ilə yanaşı, “Annesi” də məhkəməyə baş vurmağa hazırlaşır.

Bəs fanatı nə gözləyir?

Fransa qaynaqları Buadeni itələyən həmin azarkeşin noyabrda məhkəmə önünə çıxacağını xəbər verir. Futbolçu özü də oyundan sonra polisə müraciət edib. Lükü müayinə edən məhkəmə-tibb eksperti onda heç bir zədə aşkarlamayıb. Bununla belə, fanatı bir ilə qədər həbs cəzası və 15 min avro cərimə gözləyir.

"FOOTBALL-PLUS.AZ"