“Bordo”nun aqibəti məlum olub. Komanda gözlənilən cəzanı alıb.

"Football-plus.az" xəbər verir ki, “Bordo”ya Liqa 2-nin “Rodez”lə yarımçıq qalmış oyununa görə texniki məğlubiyyət verilib.

2-ci divizionun sonuncu – 38-ci turunun oyunu 20-ci dəqiqədə dayandırılmışdı. “Rodez” in yarımmüdafiəçisi Lük Buadenin qolundan sonra “Bordo”nun azarkeşi tribunadan çıxmış və qolu bayram edən oyunçunu itələmişdi. Ciddi xəsarət alan futbolçu meydandan xərəkdə çıxarılmışdı.

Liqa 2-nin İntizam komissiyası bu insidentə görə “Bordo”ya texniki məğlubiyyət verməyi qərara alıb. Qeyd edək ki, komanda növbəti mövsüm Liqa 1-ə vəsiqə qazanmaq üçün bu matçda mütləq qalib gəlməliydi. Ancaq şansını bu şəkildə itirib. Beləliklə, növbəti mövsüm Liqa 1-də 2-ci divizionun qalibi “Havr” və 2-ci yeri tutan “Mets” çıxış edəcək. Mövsümü 3-cü yerdə başa vuran “Bordo” çıxışını Liqa 2-də davam etdirəcək.
Bundan əlavə, “Rodez” məlum qərar sayəsində Liqa 2-də qalmağı bacarıb. “Annesi” isə 17-ci yeri tutaraq 3-cü diviziona düşüb.