“Qarabağ” infrastrukturunu Bakıda qoyub, məkanını da paytaxtda genişləndirməlidi"
“Qarabağ”ın səviyyəsinə uyğun keyfiyyətli futbolçular alacağıq”.
“Football-plus.az” xəbər verir ki, bunu “Qarabağ”ın prezidenti Tahir Gözəl çempionluq ziyafətində jurnalistlərə açıqlamasında deyib.
“Zirə”nin hücumçusu Hamidu Keytanı transfer etdiklərini açıqlayan klub rəhbəri başqa keçidlər üçün çalışdıqlarını bildirib:
“Qarabağ” artıq ulduz yetişdirən klubdu. Büdcəmiz çatan ən yaxşı cavan, istedadlı futbolçular seçiləcək. Onlarla birlikdə yenə Avropada önəmli yerlərdə qərarlaşacağıq. Uğurlu ilimiz oldu. Klubdan növbəti mövsüm daha uğurlu çıxış gözləyirəm. Bunun üçün önlərində heç bir əngəl yoxdu”.
O, 10-cu premyer-liqa çempionluğunun əhəmiyyətindən bəhs edib:
“10-cu çempionluq Azərbaycanda ilkdi. Bu bizi çox sevindirir. Hamımızda ayrı bayram sevinci var. 10 çempionluq o deməkdir ki, bu klubda artıq qələbə ruhu formalaşıb. “Qarabağ”ın loqosunda bir ulduz var. UEFA hər 5 çempionluğa bir ulduz verir. Bizim də loqomuz dəyişəcək, orada iki ulduz olacaq. Bu, böyük nailiyyətdi”.
T.Gözəl zəfəri işğaldan azad olunmuş Qarabağın təmsilçisi kimi qeyd etməyin onlar üçün qürur mənbəyi olduğunu vurğulayıb:
“Bizə bu xoşbəxtliyi bəxş edən Prezident İlham Əliyevə, hökumətə və şəhidlərimizə minnətdarlığımı bildirirəm”.
Tahir Gözəl gələcəkdə bəzi vacib görüşlərin Ağdamda təşkilini də istisna etməyib:
“Avropada müntəzəm oynayan “Qarabağ” kimi klubun əsası artıq Bakıdadı. Ölkə başçısının göstərişi ilə Ağdamda da stadionlar tikiləcək. Bu, vaxt aparan prosesdi. Doğru zamanda oyunlarımızı orada keçirməyimizə həmişə şad olaram. Bu, bizim üçün fəxr olar. Ancaq düşünürəm ki, “Qarabağ” infrastrukturunu Bakıda qoyub, məkanını da paytaxtda genişləndirməlidi. Lazımlı, önəmli matçlarımızı Qarabağda keçirmək bizim üçün böyük şərəf olar”.
Digər xəbərlər
