Kadinin “Qarabağ”a gəlişini xatırlayıram. Klubun mətbuat xidməti malina mürəbbəsinə aid video hazırlamışdı.

Çünki futbolçunun soyadı Malinovski idi. Həmin vaxt azarkeşlər “Qarabağ” rəhbərliyini lağa qoyurdu, biri aşpazın, biri bazar adamının transfer edildiyini deyirdi. Çünki braziliyalı Portuqaliyanın 3-cü divizionda çıxış edən “Vilafrankense” klubundan alınmışdı. Orda 33 oyunda 5 qol vurmuşdu. Azarkeşlər bu transferə görə klubu xəsislikdə qınayırdı. Komanda çempionluğu əldən vermişdi. Əzəli rəqib “Neftçi”də toy-bayram idi. Rəhbərlik isə Portuqaliyanın 3-cü divizionundan bir futbolçuya ümid bağlayırdı. Həmin vaxt yazmışdım ki, ağdamlılar siyasətini dəyişib, artıq potensialı olan gənc əcnəbilər transfer ediləcək, onlarla 2-3 illik müqavilə imzalanacaq və sonradan baha qiymətə satacaqlar.

Kadi ilk mövsümdəcə özünü doğrultdu. Braziliyalı futbolçu yarımmüdafiənin həm mərkəzində, həm də sağında şou göstərdi. Komandanın Konfrans Liqasının pley-offuna vəsiqə qazanmasına, çempion olmasına, kubok qazanmasına yardım etdi. Azarkeşlər onu çox sevməyə başladı. Artıq “Kadi varsa, qələbə var” düşüncəsi formalaşmağa başladı.

İndi isə dövran dəyişib. Kadi “Qarabağ”ı tərk etmək istəyir. “Krasnodar” “köhlən atlar”ın ulduz futbolçusuna göz dikib. Bu keçid üçün nə az, nə çox - 5 milyon avro xərclənəcək. Azarkeşlər sosial şəbəkələrdə həm klub rəhbərliyini, həm də Kadini qınayır. Hər iki tərəf pula hərislikdə qınanılır. Bəs məsələnin əsli nədi? “Qarabağ” Kadini satmaq istəmir. “Krasnodar” futbolçunu heyətinə cəlb etmək istəyir. Braziliyalının bir müddət əvvəl bağladığı yeni müqavilədə “5 milyon avro ödənilərsə, sərbəst qala bilər” bəndi var. Ruslar da bundan yararlanır. Bəs bunu “Krasnodar” rəsmiləri hardan bilir? Bu məsələləri çox düşünmək lazım deyil. Təbii ki, Kadi oyunu ilə Avropa klublarının diqqətini cəlb edib. Onunla maraqlananlar çoxdu. Əlbəttə, futbolçunun meneceri kimlərinsə qulağına nəsə pıçıldayıb.

Onu deyirəm axı. Kadi və rəhbərlik xalq düşməni olub. Çünki braziliyalı 5 milyona satılır. Əslində sevinməliyik. Çünki bu keçid baş tutsa, Azərbaycan tarixində ilk olacaq. Klubun büdcəsi daha da artacaq. Klubun prezidenti Tahir Gözəl söz verib ki, bu pul Qurban Qurbanovun sərəncamına veriləcək. Yəni qışda Kadinin keçidi baş tutsa, ağdamlılar səviyyəli futbolçular transfer edə biləcək. Biləcəkmi? Yox! Çünki Qurban Qurbanov artıq yeni strategiya üzrə hərəkət edir. Kadi, Leandro Andrade kimi gənc futbolçular transfer olunur, onlarla uzunmüddətli müqavilə imzalanır. Bu səhv addımdı? Əslində “Qarabağ” üçün yox. Hamı Kadinin ustalığından danışır. Amma unutmaq lazım deyil ki, braziliyalı Ağdam təmsilçisində püxtələşdi, Qurban Qurbanovun rəhbərliyi altında bu səviyyəyə çatdı. 2 il əvvəl Kadini tanıyan var idi? Niyə bu qədər səs-küy salınır ki? Onsuz da “Qarabağ” premyer-liqada, demək olar ki, çempionluğu təmin edib. Kadili və ya Kadisiz “Gent”i keçmək potensialındadı. Bundan artıq nə istəyirik? Konfrans Liqasında çempionluq? İndiki dövrdə bu mümkün deyil. Bunun üçün “Qarabağ”ın büdcəsi 30-40 milyon civarında olmalıdı, rəqabətli çempionatda yarışmalıdı ki, bu artıq başqa söhbətin mövzusudu.

Kəsəsi, Kadinin “Qarabağ”dan getməsi yaxşı olacaq, nəinki pis. Çünki ehtiyatda Leandro Andrade, Filip Ozobiç kimi futbolçular var. Hətta yeni transferləri də nəzərə alsaq, “köhlən atlar”ın daha da güclənəcəyini söyləyə bilərik. Vaci yayda gedəndə hamı saç-baş yolurdu ki, Qurban Qurbanov səhv etdi, komanda zəifləyəcək. Nə oldu? Kadili, Zubirli, Ovusulu, Ozobiçli, Riçardlı, Qaralı “Qarabağ” daha yaxşı çıxış etdi. Bir həqiqəti bilmək lazımdı: komandanın uğurlu çıxışının səbəbi fərdlərdə yox, sistemdə gizlənir. Sistem yaxşı olandan sonra Kadi getsə də, qalsa da, fərq etməz. Onsuz da Malinovskini Kadi edən Qurbanov hardansa bir əcnəbi gənc tapıb ondan da ulduz düzəldəcək!

İLKİN SULTANLI